Wednesday 25 May 2016

اساں لائیاں نے دساں گے نبھا کے

اساں لائیاں نے دساں گے نبھا کے
سوں رب دی دوارے تیرے آ کے
بابا جی ساڈا حج ہو گیا
تیرے در اتے سر نوں جھکا کے
جالی روزے دی اکھاں دے نال لا کے
بابا جی ساڈا حج ہو گیا

تیرے پیری نئیں زمانہ ایویں پئیا اے
گھر تیرا وی تے خانے کعبے جہیا اے
اکھاں جیہنے جیہنے تیرے نال لائیاں
مونہوں منگیاں مراداں اوہنے لائیاں
بابا جی ساڈا حج ہو گیا

تیری گلی بابا جنتاں دی گلی اے
تیری پشت اتے پیر مولا علی اے
تیرا مکھڑا تے ساڈے لئی قرآن اے
تیری دید ساڈا دین تے ایمان اے
بابا جی ساڈا حج ہو گیا

ودھ شاہی نالوں تیریاں غلامیاں
ایویں کیتیاں نئیں صابری نظامیاں
چاروں پاسے اج مچیاں دھائیاں
رل عاشقاں دھمالاں اج پائیاں
بابا جی ساڈا حج ہو گیا

نسبت بابا دی میرا کمال کوئی نہیں 
ایویں جانڑدا نہیں سارا جگ مینوں
میں تے بابا دے پیراں دی خاک نصرت
کیویں کرے گا کوئی الگ مینوں
میں تے عشق فرید ان نچدا ہاں
لگی ہوئی اے عشق دی اگ مینوں
بے شک بریؔ نظامی نہ آکھو مینوں
آکھو آکھو فرید دا سد مینوں

مکھ تیرے جویں چودھویں دا چند اے 
تیرا ولیاں چوں رتبہ بلند اے
تینوں تکناں خدا نوں تک لیناں اے
ایہو عاشقاں دیوانیاں نے کہنا 
بابا جی ساڈا حج ہو گیا

تیرا روپ تے بہروپ جان بیٹھے آن
تائیوں بوہے تیرے اسی آن بیٹھے آن
تیرے ناں دیاں ونڈیاں نیازاں
بریؔ پڑھ پڑھ آکھیے نمازاں
بابا جی ساڈا حج ہو گیا

بری نظامی