کسے نہ بوہا آ کھڑکاؤنا، کہڑا میرا دردی
ایویں بہہ کنسواں لیناں، کنڈی لا کے گھر دی
اک اک کر کے ڈبدے جاندے، آساں والے تارے
دیکھاں خورے تھمدی ہووے، لمی رات ہجر دی
اس بستی وچ ڈیرے لا لئے، دکھاں درداں پیڑاں
جتھے اگے گولدی پئی سی، یاد کسے دلبر دی
جیہدے اگے لپ بہائیے، اوہو بک بک رووے
ساون دی گھٹ ایہہ اکھ میری، کتھے جا کے ورھدی
چنگی رہ گئی چھالاں لا کے سوچاں وچ نہ ڈبی
عشق جھناں دیاں چھلاں اتے، سوہنی لگدی تردی
کجھ اپنے کجھ اوہنے دتے، تے کجھ دنیا دیندی
جان نمانی حیدرؔ جی دی دکھڑے جاندی جردی
کرم حیدری
