رب دی دُھپ میں کِتھے بیہہ کے سیکاں گا
سوچن والی گل، مسیتے سوچاں گا
جنت دا بُوہا تے اج وی کُھلا سی
مُوڈ نہیں سی میرا، میں کل ویکھاں گا
کاں کاں کردیاں کاواں نوں میں کیہ کیہندا
چُپ دے ویلے دل دے گُھنڈ میں کھولاں گا
روندیاں کنڈیاں اگّے ہسدا ریہنا واں
کِھڑ، کِھڑ ہسدے پُھلاں اُتّے روواں گا
نِکّی ساری گل تے پیکے ٹُر پئی اے
ایڈی لال ہنیری کِنج میں روکاں گا
بدلہ لین دے بڑے طریقے ہوندے نیں
تیرے پِچھے عشق دے شِکرے چھڈاں گا
سُکھ تے چین دی فصل وی پکّے گی مسعودؔ
رتّیاں رتّیاں بالو شاہیاں توڑاں گا
مسعود منور