پیار سنبھل کے نیوں لا پچھوں پچھتاویں گا
جاندا جا نہ آویں پھیر
اوتھے بے پرواہی ڈھیر
اوتھے ڈیہل کھلوندے شیر
تُوں بھی پھدّیا جاویں گا
کھوہ وچ یوسفؑ پائیو نیں
پھڑ وچ بازار وکائیو نیں
اک اَٹی مُل پُورا لائیو نیں
توں کوڈی مُل پوائیں گا
پیار سنبھل کے نیوں لا پچھوں پچھتاویں گا
نیوں لا ونچ زلیخا لے
اوتھے عاشق تڑفن پے
مجنوں کردا ہے ہے ہے
تُوں اوتھوں کیہ لیاویں گا
پیار سنبھل کے نیوں لا پچھوں پچھتاویں گا
اوتھے اکناں پوست لہائی دے
اِک آریاں نال چرائی دے
اِک سُولی پگڑ چڑھائی دے
اوتھے تُوں بھی سیس کٹاویں گا
پیار سنبھل کے نیوں لا پچھوں پچھتاویں گا
گھر کلالاں دا تیرے پاسے
اوتھے آون مست پیاسے
بھر بھر پیون پیالے کاسے
تُوں بھی جی للچاویں گا
پیار سنبھل کے نیوں لا پچھوں پچھتاویں گا
دل برہن گیوں گت ہو
بھلکے کیہ جاناں کیہ ہو
مستاں دے نہ کول کھلو
تُوں بھی مست سداویں گا
پیار سنبھل کے نیوں لا پچھوں پچھتاویں گا
بلھیا غیر شرع نہ ہو
سُکھ دی نیندر بھر کے سو
مُونہوں نہ اَنا الحق گو
چڑھ سُولی ڈھولے گاویں گا
پیار سنبھل کے نیوں لا پچھوں پچھتاویں گا
بابا بلھے شاہ