بدلا ساڈے گھر نہ ڈھاویں
کالیاں اٹاں کالے روڑ
بدلا ساڈے گھر نہ روڑھ
بدلا ساڈے کچے کوٹھے
اتوں ساڈے لیکھ وی کھوٹے
ساڈی حالت ویکھ نہ ہسیں
بدلا نکے بال اساڈے
کول کدوں اے مال اساڈے
بدلا سن وے کالیا بدلا
اچے لیکھاں والیا بدلا
واسطہ تینوں رب دا مڑ جا
جے ورھنائے تے تھر وچ ٹر جا
اوتھوں دے ترہائے لوکی
دھپ نیں سکنے پائے لوکی
بدلا سن وے سوہنیا بدلا
توں امبر دی اکھ دا کجلا
آنا ای تے سکھ نال آویں
بدلا ساڈے گھر نہ ڈھاویں
بدلا ساڈے گھر نہ ڈھاویں
حکیم احمد نعیم ارشد