اٹھ اوئے بابا اپنی جوہ دے دُکھ دا دِیوا بال
ٹُکر ونڈن والے اگے بُھکھ دا دِیوا بال
خورے کوئی منزل بُھلیا آ ای جاوے پَکھی
دُھپاں سڑیاں ریتاں وچ وی رُکھ دا دِیوا بال
اسیں وی تیرے آدمؑ جائے اُتوں تے نئیں ڈِگے
جُھگیاں وِچ وی کدے کدائیں سُکھ دا دِیوا بال
خورے اُجڑے گھر دے آلے جگ نوں چنگے لگن
ساڈے نیناں وِچ وی اپنے مُکھ دا دِیوا بال
روٹی جوگا وی نئیں آٹا بھانویں وِچ کنالی
فیر وی بُلھاں اتے رَجی کُکھ دا دِیوا بال
اوہناں وِچوں مُک جاندی اے انکھ دی بابا لو
جیہڑے لوکی ٹُر پیندے نے بُھکھ دا دِیوا بال
بابا نجمی