جدید پنجابی شاعری
شکاری پرندہ
باز ہوائیں اُڈن والا جدوں اُڈاری کردا
سے کوہاں دی تاری کر کے منجھی چڑہدا آ کے
آپ شکاری ہو کے ہویا آپوں اج شکار
اپنا بہتا زور لگاندا منت ترلا پا کے
آخرکار اوہ قیدی ہویا ہتھ دُشمن دے آیا
ڈاہڈی آ بنی مجبوری طوق غلامی پا کے
بنھ دتیاں اس جنگہاں باہاں سیڑ دِتا پر سارا
ہُن رہیا نہ اُڈن جوگا بیٹھا آس لگا کے
بھکھا پیاسا لاغر ہویا صبر پیالہ پی کے
راتیں دا جگراتا کٹے اکھ نال اکھ نہ لاکے
میں پنچھی درویش کہاواں آہلنا نہیں بناندا
میں مُردار کدی نہ کھاواں بھانویں ہوون فاقے
ہور کسے شکاری والا کدی شکار نہ کھاواں
اپنا ماراں اپناں کھاواں شکر کراں ایہ کھا کے
بن شکاری کراں اُڈاری نظر زمیں تے رکھاں
میںتھوں جیھڑا اُچا اُڈدا پھڑدا اوہنوں جا کے
میرا ڈیرہ بہت اُچیرا چوٹی اُتے رہندا
میں درویش کہاواں تائیں نہ رہندا گھر بنا کے
“رہے دلیر نہ ہارے ہمت بابر نہیں شکاروں
بادشاہاں دے ہتھ پر بہندا بعد غموں بسیاروں
پیریں گھنگھرو گل حمائل سر پر تاج شاہانہ
گوشت کھاندا پٹ ہنڈادا بیٹھا کر شکرانہ”
کیتا صبر نہ ہاری ہمت آخر پھریا پاسہ
سختی والی منزل گزری شاہی محل وچ جا کے
رب سوہنے دی کر تعریفاں نیواں ہو ہو جائ
جسنوں آپ بچاوے اوہوکوئی نہ مارے آ کے
بادشاہاں نوں وختے پاویں کردے پھرن گدائی
نوکر نوں تُو شاہی دیویں اُچے تخت سجا کے
یوسف نوں آزمائش کیتی کھوہ وچ پایا بھائیاں
پھر مصر دی شاہی دتی اُتےتخت بٹھا کے
“واہ واہ صاحب سرجنہارا ملکاں جِن انساناں
اربع عناصر تھیں جس کیتا گوناگون حیواناں
کُن اوہدی نوں کوئی نہ پہتا عاقل بالغ داناں
در اُسدے سر سجدے سٹے لوح قلم اسماناں
حکم اوہدے بن ککھ نہ ہلدا واہ قدرت دا والی
جیا جون نگاہ اوہدی وچہ ہر پتر ہر ڈالی
آپ مکانوں خالی اُس تھیں کوئی مکان نہ خالی
ہر ویلے ہر چیز محمد رکھدا نت سنبھالی”
کر تعریفاں تے توصیفاں رب نوں راضی کردا
میں ہاں ہک شکاری پنچھی عرض کیتی شرما کے
جس بندے دا تو ایں والی نہ اس فکر نہ چنتا
سے برس دی قیدوں چھٹیا شاہ ہویا اوہ جا کے
لو سجنو ہُن چلیا عاجز اپنی گل سنا کے
جس جائی وچہ قدر نہ ہووے کی لینا فیر جا کے
محمد یوسف عاجز