میرے لِکھ لے دل تے بول سجن
اس عشق دے چکر گول سجن
جداں لگدا عشق ہُلارا اے
فیر چلدا کوئی نہ چارا اے
ایہہ بھار عشق دا بھارا اے
نہ سمجھیں عشق مخول سجن
اس عشق دے چکر گول سجن
٭
اس دی ہلچل انوکھی اے
اس بحر دی چھل انوکھی اے
اس عشق دی گل انوکھی اے
ہِن ایہدے عجب ماحول سجن
اس عشق دے چکر گول سجن
٭
شاہیاں دی پامالی کر چھڈدائے
در در دا سوالی کر چھڈدائے
انج اندروں خالی کر چھڈدائے
جیویں خالی ہوندائے ڈھول سجن
اس عشق دے چکر گول سجن
٭
کئی گھر اجاڑے عشقے نے
کئی تن من ساڑے عشقے نے
کئی سولی چاڑے عشقے نے
دئے خاک دے وچ مدھول سجن
اس عشق دے چکر گول سجن
٭
اے جند نذرانہ کر چھڈدائے
دنیاں توں بیگانہ کر چھڈدائے
اِنج عشق دیوانہ کر چھڈدائے
کر چھڈدائے ڈانواں ڈول سجن
اس عشق دے چکر گول سجن
٭
مرن توں پہلے مرنا پوندا اے
کچے گھڑے تے ترنا پوندا اے
بازی جت کے ہرنا پوندا اے
اے تھل اِچ دیندا رول سجن
اس عشق دے چکر گول سجن
٭
کُتیاں دے پیر چما چھڈدائے
رانجھے دے کن پڑوا چھڈدائے
اے زہراں گھول پیوا چھڈدائے
کر دیندا ایہہ بے مول سجن
اس عشق دے چکر گول سجن
٭
وچ پیراں گھنگھرو پا نچیا
آرائیں دے اگے شاہ نچیا
ہو جگ توں بے پرواہ نچیا
بُلھا نچیا جندڑی گھول سجن
اس عشق دے چکر گول سجن
٭
اس بحر اچ علم دین وڑیا
اس عشق نے عامر نوں پھڑیا
ممتاز وی پھانسی جا چڑھیا
ہے اج وی اے پرچول سجن
اس عشق دے چکر گول سجن
٭
گھر بار لٹاونے پوندے نے
دند بتری کڈھانیں پوندے نے
کِل جبھ تے ٹھکانے پوندے نے
پیندے جھلنے ہن ترشول سجن
اس عشق دے چکر گول سجن
٭
چھال اگ دے وچ مروا دیندائے
چھُری پُتر دے گل چلوا دیندائے
اے اپنا آپ منوا دیندائے
ہئی شک قرآن چا کھول سجن
اس عشق دے چکر گول سجن
٭
سید پیاسے عشق کوہاوے
سر نوں سجدے وچ کٹاوے
نیزے تے قرآن سناوے
جد سوچاں اٹھدے ہول سجن
اس عشق دے چکر گول سجن
٭
اے رب نال متھا لا دیندائے
فیر رب وی کُن فرما دیندائے
اس جگ دی کھیڈ رچا دیندائے
ہن عشق دے بھید نرول سجن
اس عشق دے چکر گول سجن
٭
رب یار نوں کول بلاندا اے
سنے جتیاں آ جا آہندا اے
فیر فرق نہ رتی راہندا اے
اے قران دے سچے قول سجن
اس عشق دے چکر گول سجن
٭
کدی عشق بولے ناراں وچ
کدی یار رواوے غاراں وچ
مروا دئے پتھر بازاراں وچ
گل ایہہ وی بہوں انمول سجن
اس عشق دے چکر گول سجن
٭
کداں سیٹھ مدثر رکدی اے
گل عشق دی کتھے مکدی اے
اس عشق نوں دنیا جھکدی اے
نہ اس دے بھید پھرول سجن
اس عشق دے چکر گول سجن
مدثر بھارا