دل ویچ کے دلبر سوہنے نوں دلدار دی پوجا کرنی اے

 دل ویچ کے دلبر سوہنے نوں، دلدار دی پوجا کرنی اے

تُو سانبھ مسیتاں اے مُلاں، اساں یار دی پوجا کرنی اے

اساں نیت عشق دی نیتی اے، کی کرنا صوم صلاتاں نوں

دلدار ہی ساڈا مذہب اے، دلدار دی پوجا کرنی اے

تُو صوفی اے اساں عاشق ہاں، تیرے نال محبت نیں نبھنی

تُو سجدہ کرنا اے کعبے نُوں، اساں یار دی پوجا کرنی اے

یا شکل ہووے بت خانے دی، یا بھیس وٹاون کعبے دا

سرکار ملن جس صورت وِچ، سرکار دی پوجا کرنی اے

جد کافر عشق چہ ہو بیٹھے،تسبیح تے مصلہ کی کرنا

اساں پیار بتاں نال پایا اے، بس پیار دی پوجا کرنی اے

جھیڑے مکتب صوفی پڑھدے نے، اوہو مکتب سارے چھڈ دیتے

ہن عشق کتاب دے پڑھنے لئی، رخسار دی پوجا کرنی اے