میں ایویں چیک نہیں ماری

 میں ایویں چیک نہیں ماری

میں ایویں چیک نہیں ماری

کسے امبراں توں سٹے نیں 

ستارے توڑ کے راتیں 

نہیں لاشاں لبھدیاں پئیاں 

میں ایویں چیک نہیں ماری

کوئی گھاٹا کھا گیا مینوں 

جویں کوئی روگ جُثے دا 

نرویا ماس کھاندا اے 

میں ایویں چیک نہیں ماری

مِرے اندر دے کوٹھے چوں 

اجیہی واج آئی اے 

جویں کوئی آس مردی اے 

میں ایویں چیک نہیں ماری

بدن چوں لاٹ نکلی اے 

تے ساہ وی ہین کوسے جہے 

جویں کوئی ہاڑ چڑھیا اے 

میں ایویں چیک نہیں ماری

کہ وگدے پانیاں دے وچ 

کوئی اپنا روڑھ کے مینوں 

ہے تاڑی ماردا پھردا

میں ایویں چیک نہیں ماری

بڑے انبار لاشاں دے 

ایہ دھرتی ماں دے سینے تے 

میں اکھیں ویکھ آیا ہاں 

میں ایویں چیک نہیں ماری

مِرے موڈھے تے جیون اے 

ورہے دی رات کالی اے 

ڈراؤنے خاب آوندے نیں 

عاصم پڑھیار

عاصم پڈھیار