سَمے نوں لوڑ اے ہن ہر اک خلاصے دی
گل کرئیے تصویر دے دوجے پاسے دی
توں لوکاں دے حال دے اُتے ہسنا ایں
توں نہ کر سانوں تلقین دلاسے دی
طعنے، میہنے، چڑکاں، سب سما جاندے
کی دساں گہرائی تینوں کاسے دی
وقت دیا فرعوناں توں وی غرق ہونا
سٹ پینی جدوں ہاواں والے عاصے دی
لوک جدوں دے پُکھے مردے ویکھے نے
پیڑ نئیں جاندی سینوں کھبے پاسے دی
کھیڈ ساہنواں دی مک جانی اے سلطانی
کی زندگی اے پانی وچ پتاسے دی
مزمل اقبال سلطانی
No comments:
Post a Comment
Note: only a member of this blog may post a comment.