کی دُکھ ای؟
تیریاں ہس ہس کے اکھاں سُج گیاں نے
کی دُکھ ای؟
کُھسرے نے کسے دے بچے نوں کھڈایا
آپ جم نئیں سکیا
آ دُکھ ای
گونگے نوں خواب اچ رب مِلیا
او دس نئیں سکیا
آ دُکھ ای
اماں نے پُتر دا سوئیٹر اُونیا
تے نُوں نُوں چنگا نئیں لگیا
آ دُکھ ای
پنج پراواں کولوں وی، ویکھ یار
ابّا پل نئیں سکیا
آ دُکھ ای
جیندی پَین نوں مری لکھدیاں خدا نے
اودھا ہتھ نئیں پھڑیا
آ دُکھ ای
اودھے پُتر نے انگریزی چ گل کیتی
ہائے پنجابی بول نئیں سکیا
آ دُکھ ای
سیلاب چ رُڑے سامان دی خیر اے
یارمائی دا چرخہ نئیں لبھیا
آ دُکھ ای
بولا جے رب نوں مخاطب ہو کے آکھے
میں نصرت نئیں سُنیا
آ دُکھ ای
سہیل کاہلوں
No comments:
Post a Comment
Note: only a member of this blog may post a comment.