پتھر ہوئی اکھ دا نوحہ
بھاویں ڈانگاں دے نال مارو
اک اجیہی کندھ آں میں
یا تے ہاں منزل دا آگو
یا صدیاں دا پندھ آں میں
چُپ آں مڑھیاں تے قبراں دی
ڈاہڈی کلّی جُوہ آں میں
سڑدی بلدی دُھپ آں خورے
یا فر پکا کھوہ آں میں
کیڑِیاں بھریا ٹُک آں خورے
یا اک مُٹھ سواہ دی آں
میں تے ہاں دُکھاں دا لاڑا
میں تے مٹی راہ دی ہاں
ٹُٹی ہوئی ونگ آں خورے
اُڈدا ہویا ککھ آں میں
بلدا بُجھدا سُفنا کوئی
پتھر ہوئی اکھ آں میں
رفاقت حسین ممتاز
No comments:
Post a Comment
Note: only a member of this blog may post a comment.