دکھ تے سکھ دا ہر اک جھگڑا مک جاندا اے

 دُکھ تے سُکھ دا ہر اک جھگڑا مُک جاندا اے

خون جدوں شریاناں اندر سُک جاندا اے 

جس نوں دیمک خود غرضی دی لگ جاندی اے

اوہدے دل چوں پیار تے اُکا مُک جاندا اے

تیرے باجھوں میرا حال وی اِسراں ہُندا

بِن مالی دے بُوٹا جِسراں سُک جاندا اے

اوہدے وِچھڑن دا میں شکوہ کردا کِسراں

نھیرے وِچ پرچھاواں تیکر لُک جاندا اے

اس توں اگے خورے کی کی منظر ہوون 

سوچ دا پنچھی جہڑی تھاں تے رُک جاندا اے

لگدا اے اک ایسا وی دکھ ہر بندے نوں

جہڑا اوہدیاں ساہواں نوں ہی ٹُک جاندا اے

ڈِگدا اے سر پگڑی نال سلیم اسے دا

جہڑا اج کل حد توں بہتا جُھک جاندا اے 

عمران سلیم