اک اک کمرہ نو نو جی
جائیے کدھر کرئیے کی
حاجت لئی میں لین بنائی
گھنٹے مگروں واری آئی
واری میری لیٹ لوائی
فاقے خون جگر دا پی
اک اک کمرہ نو نو جی
بجلی دا بل دُونا آیا
نلکے دا بل دونا سوایا
بل گیس دا، نال کرایہ
اک منجی وی ٹُٹ گئی ہی
اک اک کمرہ نو نو جی
پاؤ آلو تے لماں شورا
گھر والی نوں لگا جھورا
بُرکی ڈگدی بھورا بھورا
برکت دیکھی ڈپو دی
اک اک کمرہ نو نو جی
گھیو مہنگا رمضان چ آٹا
آڑھتیاں دا موٹا گھاٹا
ماڑے نوں ہر پاسیوں گھاٹا
دو عیداں تے روزے تیہھ
اک اک کمرہ نو نو جی
اک کمرے وچ داج نونہاں دا
سوہرا باہر تے راج نونہاں دا
مُکدا نئیں کم کاج نونہاں دا
تِیجی آئی تے پے گئی پیہھ
اک اک کمرہ نو نو جی
اک کمرہ تے ڈھیر پروہنے
سوندے ہو کے اونے پونے
سِدھے ہون تے ہو جان چونے
اک دوجے نال ہوئے فری
اک اک کمرہ نو نو جی
اک کمرے وچ ستر نہ رہندا
پیو کھنگے تے پُت اٹھ بہندا
پُت جا نونہہ توں لیکھا لیندا
اسل وٹے لیندی دِھی
اک اک کمرہ نو نو جی
سب دا پردہ ہو گیا سانجھا
وچ دھلیجاں سوں گیا رانجھا
پنج چھ بال لیایا بھانجا
تنگ ویہڑے تے بندے ویہھ
اک اک کمرہ نو نو جی
ہر نُکرے اک شور شرابا
بوہتے بال نہ مندے دابا
ہتھ اٹھارہ اک وے چھابا
تِن پُتر تے دِھیاں چِھی
اک اک کمرہ نو نو جی
جائیے کدھر کرئیے کیہ
سائیں اختر لاہوری
سائیں اختر لہوری
No comments:
Post a Comment
Note: only a member of this blog may post a comment.