جس دل وچ سجناں وس جائیے

 جس دل وچ سجناں وس جائیے

اس دل تے ظلم کمائی دا نئیں

جدوں پیار کسے نال پا لئیے

اونوں کلیاں چھڈ کے جائی دا نئیں

جس دل وچ سجناں وس جائیے

مینوں کلیاں چھڈ کے ٹر چلیوں

کی دل وچ گل سمائی اے

غیراں دے آکھے لگ لگ کے 

سجنڑاں توں مکھ پرتائی دا نئیں

آ سامنے اکھ وچ اکھ پا کے

اک دوجے نوں آزما لئی اے

دل نال وٹا کے دل سجناں

انج اپنا آپ لکائی دا نئیں

میں ڈاروں وچھڑی کونج وانگوں

رہنی آں تیری اڈیکاں وچ

جے رولناں ای تے رول وی جا

انج چوٹھا لارا لائی دا نئیں

تینوں کی دساں توں جانڑدا نئیں

اے پیار دی گل طبیبا وے

جیہڑا زخم اوہ دلبر یار دیوے

اس زخم تے مرہم لائی دا نئیں

جے مل پئیے کدی راہواں وچ

حال اک دوجے دا پچھ لئیے

مکھ پھیر کے اپنے سجناں توں

انج کولوں دی لنگ جائی دا نئیں

تو کیہڑے پینڈے ٹُریا ایں

اے پینڈا اے بدنامی دا

دکھ دیوے یوسف جے ماہی

دکھ سہہ لئیے کرلائی دا نئیں

انور حسین جوگی