لہو وچ رنگیا رنگ نہ ہووے
امن ہووے پر جنگ نہ ہووے
ذہناں اُتے زنگ نہ ہووے
بے درداں دا سنگ نہ ہووے
خُشحالی دیاں ہوون رُتاں
کدھرے وی بھُکھ ننگ نہ ہووے
چھنکے وصل دی جھانجرچھن چھن
ٹُٹی ہجر دی ونگ نہ ہووے
اک دوجے دا درد ونڈائیے
سوچ کسے دی تنگ نہ ہووے
پیار ہووے ہر دل دے اندر
نفرت والا ڈنگ نہ ہووے
حق تے سچ نوں آکھن والا
سُولی اُتے ٹنگ نہ ہووے
اُجڑے نہ کوئی تخت ہزارہ
کلّر کھادا جھنگ نہ ہووے
ارشد میرے دیس دے اندر
غُربت والی کھنگ نہ ہووے
ارشد منظور
No comments:
Post a Comment
Note: only a member of this blog may post a comment.