وارداتریا
امن والا سلسلہ دنیا توں مُکی جا رہیائے
بُوٹڑا سُکھ چین دی چھاں والا سُکی جا رہیائے
بے دریغ اک سُورما گُھگھی پھنڈُکی جا رہیائے
داتری دے نال اک تھہوڑا وی چُکی جا رہیائے
گیڑوائے تے کُھوہ ہمیشہ ظُلم والا گھیڑدائے
چھیڑدائے تے راگ مِٹھا شانتی دا چھیڑدائے
بولدائے جو کجھ اوہدے چیتے توں اُکی جا رہیائے
داتری دے نال اک تھہوڑا وی چُکی جا رہیائے
توڑدا قانون نوں جُھکدا نئیں، تھکدا نئیں
اس جیہا بے درد ہمسایہ وی ہو سکدا نئیں
اپنے ہمسائے نوں جو کُٹی تے ٹُکی جا رہیائے
داتری دے نال اِک تھہوڑا وی چُکی جا رہیائے
قہر دے لشکر دے لشکراں دیاں آخر کدوں تک چھاؤنیاں
اک نہ اک دن ایسیاں خبراں وی انور آؤنیاں
مارنے والا کسے نوں آپ مُکی جا رہیائے
داتری دے نال اک تھہوڑا وی چُکی جا رہیائے
انور مسعود
No comments:
Post a Comment
Note: only a member of this blog may post a comment.