آکھیا سی ناں کم نہیں آونے سجناں دے سجناپے

آکھیا سی ناں

آکھیا سی ناں کم نہیں آؤنے سجناں دے سجناپے

مِٹی پا کے مُڑ آؤندے نیں کیہ سجن، کیہ ما پے

محل منارے چھڈنے پینے کفن چ کھیسا کوئی نہ

چار دِناں دی کھیڈ اے بیبا! نہ کر ایڈ سیاپے

کُوچ نقارہ وجنا اے جد، سُرت کوئی نئیں رہنی

مال بگانہ کُھس جانا اے، جد پینے نی چھاپے

من خالق دا کہنا کر لے کُجھ مخلوق دی سیوا

سامنے آؤندا کھٹیا وٹیا جد او تولے ناپے

ستر ماواں نالوں ودھ کے پیار کرے رب سوہنا

جیہڑا بندہ دشمن لئی وی پیار دا گیت الاپے

چائیں چائیں کراں تیاری سوہرے گھر جاون دی

ملاں ڈردا جس تھاں سانوں جھوک سجن دی جاپے

مینوں کاہدی فکر منزہ چھم چھم نچدی جاواں

میرا مُرشد اُچا، میری فِکر کرے گا آپے

منزہ شاہد

زین جی آج یہ غزل بھی مکمل کر دی ہے۔