نوکر دا بچہ
بی بی میڈا کوئی گھر کے نی
خیر اِتھاں وی لنگر کے نی
روٹی کھانویں، کپڑے پانویں
کم دے ویلے بال کھڈانویں
ایں منزل تے ممتا ہارے
ما بچڑے کوں چاٹاں مارے
جیہڑے ویلے مار کھڑو وے
ما وی رووے، بال وی رووے
جھنڑکاں کھاندا نیر وہیندا
جے اے بچہ رہ گیا جیندا
ایہہ بنڑسی انسان دا دشمن
مال دا دشمن جان دا دشمن
ایندے دل وچ رحم نہ ہوسی
ایہہ لوکاں دے بچے کوہسی
اپنڑا بچپن یاد کریسی
ایہہ ماڑیاں کوں بھائیں لیسی
جے کجھ ایندے ہتھ وچ آیا
اے بنڑسی عزریل دا سایا
حسن رضا گردیزی
No comments:
Post a Comment
Note: only a member of this blog may post a comment.