جُھگیاں وِچ وی پھیرا پا کے ویکھ لوے
ساڈی وی تے پِیڑ ونڈا کے ویکھ لوے
جنہیں حالے تیک سمندر تکیا نہیں
اوہنوں آکھو میرے اندر آ کے ویکھ لوے
میرے مڑھکے نال کھلوتا تاج محل
جُھوٹھا واں تے گل کروا کے ویکھ لوے
میرے دم نال گٹکے ویہڑا مکے دا
مینوں وچوں پرھاں ہٹا کے ویکھ لوے
ساڈی اک اک جُھگی اک مسودہ اے
سخنوراں چوں کوئی وی جا کے ویکھ لوے
تیرے پُتر وانگوں میرا پُتر وی
لمبڑدارا! بستہ پا کے ویکھ لوے
میرا اک اک مصرعہ دُکھ زمانے دا
میرا کوئی وی شعر سنا کے ویکھ لوے
بابا نجمی
