سچ دا بُوہا کھول اوہ سجناں
مِٹھا مِٹھا بول اوہ سجناں
سچ دی واج نہ ڈکی جاوے
کون یذیداں نوں سمجھاوے
سچ پِچھے جو سِر لہہ جاندے
ہو جاندے انمول اوہ سجناں
سچ دا بُوہا کھول اوہ سجناں
مِٹھا مِٹھا بول اوہ سجناں
بُلہا سچ دی تان تے نچے
سوہنی تر گئی بہہ کے کچے
سچ رانجھے دے اندر مچے
سارے عاشق سچم سچے
سچ عشقے دا مول اوہ سجناں
سچ دا بُوہا کھول اوہ سجناں
مِٹھا مِٹھا بول اوہ سجناں
سجناں دے نے سوہنے مُکھڑے
ویکھ لواں بھُل جاندے دُکھڑے
سچ دی راہ تے ٹُردے ٹُردے
ویکھیں کِدرے پیَر نہ اُکھڑے
آ نہ جاوے قدماں اندر
تھوڑا جنہاں جھول اوہ سجناں
سچ دا بُوہا کھول اوہ سجناں
مِٹھا مِٹھا بول اوہ سجناں
