چن کھڑیجے ہوئے
کِہڑے رُکھ نوں پُچھاں
کِہڑے راہ تے بھالاں
کِہڑی گُٹھ چوں لبھاں
پیار کھڑیجے ہوئے
بوڑھاں تھلے رل کے کھیڈے
یار کھڑیجے ہوئے
کِہڑی رُت نوں پُچھاں
کِہڑی تھاں تے بھالاں
کِہڑے پِنڈ چوں لبھاں
مان کھڑیجے ہوئے
چیت وساکھ دے میلے وچوں
ہان کھڑیجے ہوئے
کِہڑی کندھ نوں پُچھاں
کہڑی چھت تے بھالاں
کیس گلی چوں لبھاں
راگ کھڑیجے ہوئے
لمیاں لمیاں گُتاں والے
ناگ کھڑیجے ہوئے
کِہڑی وٹ نوں پُچھاں
کِہڑے کھیت چوں بھالاں
کِہڑے کُھوہ توں بھالاں
کل کھڑیجے ہوئے
شام سویرے نِت کھڑکدے
ٹَلّ کھڑیجے ہوئے
کِہڑے دِن نوں پُچھاں
کِہڑی رات چوں بھالاں
کیس دُپہر چوں لبھاں
ڈھول کھڑیجے ہوئے
گُڑ توں مٹھے مائے تیرے
بول کھڑیجے ہوئے
کِس دریا نوں پُچھاں
کِہڑی نہر چوں بھالاں
کِہڑے ڈُمھ چوں لبھاں
دھن کھڑیجے ہوئے
کئی ورھیاں توں کئی ماواں دے
چن کھڑیجے ہوئے
ارشاد سندھو
No comments:
Post a Comment
Note: only a member of this blog may post a comment.