اماں نی مینُوں پھاہے چاڑھ
نہ سوہنڑی نہ پھبدا مینوں اکھاں دے وچ سُرمہ
میں صورت دی کوجھی نالے اس دھرتی دا بوجھ
جُثے دی بے کار کتاب چوں دل دا ورقا پاڑ
اماں نی مینوں پھاہے چاڑھ
سُگھڑاپے دے اک دا کِنہاں بے عقلاں نوں چاء
میں بُھکھے مزدور دی جائی میں نیچاں دا جم
چنّاں ورگا رُوپ نی مائیں میہنیاں دِتا ساڑ
اماں نی مینوں پھاہے چاڑھ
گُت لمکانڑدی پیلاں پانڑ دی مینوں کوئی نئیں جاچ
آس دا پانی دل دے تڑکے بھانڈے وچ کیہہ اجھکے
میں دُکھاں دی چُنی میرے اُتے ہنجو کاڑھ
اماں نی مینوں پھاہے چاڑھ
میں بیری دا بُوٹا مائے نِت پئی کھاواں ڈِھیماں
بُکل مار کے چِیکاں دَبّاں لُک لُک نِیر وہاواں
کیہندا جگرا جیہڑا ویکھے میرے دل دے پاڑ
اماں نی مینوں پھاہے چاڑھ
مقداد احسن
No comments:
Post a Comment
Note: only a member of this blog may post a comment.