چن نالوں چنگی لگے تاریاں دی چانڑی
چُپ دے ہنیرے چ اشاریاں دی چانڑی
تارواں نوں ڈوبدی اے دل والی کشتی
پانی جدوں کھچدی کناریاں دی چانڑی
اج کَلا میں آں تے دُکھاں دے ہنیرے نیں
دُھپاں چ گواچ گئی پیاریاں دی چانڑی
جتھے اکلاپا مارے کنداں نال ٹکراں
اوتھے چیتے آوندی وساریاں دی چانڑی
سوچاں والی کوٹھری چ دیوا جدوں بلدا
پِھکی پے جاندی اے چوباریاں دی چانڑی
اِنج پیا جاپدا سویر ہون والی اے
مُک چلی تاریاں وچاریاں دی چانڑی
فیدے والی اکھ نال اکو جگ دسدا
دوجی اکھ کھولدی خساریاں دی چانڑی
کدے آگے کھولاں تیرے ہجراں دی گنڈڑی
کِدی جھولی پاواں اے شراریاں دی چانڑی
اکھراں دے نور نے ای کڈنڑی اے عرفی
کچیاں دماغاں چوں مناریاں دی چانڑی
عرفان عرفی
No comments:
Post a Comment
Note: only a member of this blog may post a comment.