ساڈے نال تے اک دن انج وی ہویا ہویائے
اِنج لگدا سی سارا پنڈ ای مویا ہویائے
بس کر ایہنے سڑ کے کولا ہو جانا ای
شِیر عشق دا جہڑا کڑھ کڑھ کھویا ہویائے
نہ گجّے، نہ چمکے نہ ای وَسّے کدھرے
لگدائے بدّل رج کے کدھرے رویا ہویائے
سدھراں، تاہنگھاں، یاداں تے فر وچہ وچہ اتھرو
تیرے ورگا میں وی ہار پرویا ہویائے
توں سَیں نال تے راہ سی اُکا سدھا، پدھرا
تیرے باہجھوں تھاں تھاں ٹِبا ٹویا ہویائے
تائیوں اینا کھارا اے ساگر دا پانی
دریاواں دا نس نس مُڑھکا چویا ہویائے
اوہناں وانگوں لِف کے سدھا ہونایں تنہا
جہڑیاں رُکھاں بھار ہوا دا ڈھویا ہویائے
میر تنہا یوسفی
No comments:
Post a Comment
Note: only a member of this blog may post a comment.