ہن تے ہور وی گہرا ہو گیا اے مطلب اینا باتاں دا
نہ سڑکاں دی بھیڑ گئی، نہ اکلاپا ذاتاں دا
رُشنائی دے ٹوٹے کر کے آپ ہنیر کمایا اے
تاریاں کولوں ٹُٹ نہیں سکدا مان ہنریاں راتاں دا
ہن اصلیت کُھل گئی اے تے رووو اپنیاں عقلاں نوں
کندھاں نُوں جد پوچیا سا جے، موسم سی برساتاں دا
ٹُردے ٹُردے مل گئے آں تے آمڑ دلدیاں کہہ لیئے
پل دو پل دی سانجھ غنیمت، میلہ فیر براتاں دا
ویلے سر ایسے دی اک سانجھ سہارا بن دی اے
لہو دے رشتے نالوں پکا رشتہ قلم دواتاں دا
دھرتی نے اک کنبنی لے کے پنڈا اپنا چھنڈیا سی
آذر مُڑ کے پتہ نہ لگا فطرت دیاں سوغاتاں دا
اعزاز احمد آذر
No comments:
Post a Comment
Note: only a member of this blog may post a comment.