تیری یاد اسانوں منس کے
کجھ پیڑاں کر گئی دان وے
ساڈے گیتاں رکھے روجڑے
نہ پیون نہ کجھ کھان وے
میرے لیکھاں دی بانہہ ویکھیو
کوئی سدیو اج لقمان وے
اک جگڑا ہویا اتھرے
نت ماڑے ہندے جان وے
میں بھر بھر دیاں کٹورڑے
بلھ چکھن نہ مسکان وے
میرے دیدے اج بدیدڑے
پئے نینداں توں شرمان وے
اساں غم دیاں دیغاں چاڑھیاں
اج کڈھ برہوں دے ڈانھ وے
اج سدو ساک سکیریاں
کرو دھاماں کل جہان وے
تیری یاد اسانوں منس کے
کجھ ہنجھو کر گئی دان وے
اج پٹ پٹ ہویا نیلڑا
ساڈے نیناں دا اسمان وے
ساڈا عشق کنوارہ مر گیا
کوئی لے گیا کڈھ مسان وے
ساڈے نین تیری اج دید دی
پئے کریا کرم کران وے
سانوں دتے ہجر تویتڑے
تیری فرقت دے سلطان وے
اج پریت نگر دے سوریئے
سانوں چوکی بیٹھ کھڈان وے
اج پوناں پٹن تعزیے
اج رتاں پڑھن قرآن وے
اج پی پی جیٹھ تپندڑا
ہویا پھلاں نوں یرقان وے
تیری یاد اسانوں منس کے
کجھ ہوکے کر گئی دان وے
اج سونکن دنیاں مینڈڑی
مینوں آئی کلیرے پان وے
اج کھاوے خوف کلیجڑا
میری ہک 'تے پین ودان وے
اج کھنڈھی کھرپی صدق دی
میتھوں آئی دھرت چنڈان وے
اساں کھیڈی کھیڈ پیار دی
آیا دیکھن کل جہان وے
سانوں میدی ہندیاں سندیاں
سبھ پھاڈی آکھ بلان وے
اج بنے پرالی ہانیاں
میرے دل دے پلرے دھان وے
میرے ساہ دی قلی مرک چوں
اج کھاوے مینوں چھانھ وے
تیری یاد اسانوں منس کے
کجھ سولاں کر گئی دان وے
اج پھلاں دے گھر مہک دی
آئی دوروں چل مکان وے
ساڈے ویہڑے پتر امب دے
گئے ٹنگ مراسی آن وے
کاغذ دے طوطے لا گئے
میری ارتھی نوں ترکھان وے
تیرے موہ دے لال گلاب دی
آئے منجری بھور چران وے
ساڈے ستے مالی آس دے
اج کوری چادر تان وے
میرے دل دے مان سرووراں
وچ بیٹھے ہنس پران وے
تیرا برہا لا لا توڑیاں
آئے مڑ مڑ روز اڈان وے
شو کمار بٹالوی
No comments:
Post a Comment
Note: only a member of this blog may post a comment.