توں ہر جانڑا ای، مڑ نہ آکھیں
میں مر جانڑا ای، مڑ نہ آکھیں
توں ہاسے نال بھانویں آکھیا
میں کر جانڑا ای، مڑ نہ آکھیں
میرے اندر جھاک نہ پاویں
جے گھر جانڑا ای، مڑ نہ آکھیں
عقلے انج توں اٹکی رکھیں
میں پڑھ جانڑا ای، مڑ نہ آکھیں
ایس ظلم تے مان اے تینوں
میں جر جانڑا ای، مڑ نہ آکھیں
ویلے دی جے مٹھ اُگڑ گئی
توں ڈر جانڑا ای، مڑ نہ آکھیں
مینوں وچوں جے کڈیو ای
منظر جانڑا ای، مڑ نہ آکھیں
راتے مینوں سونڑ نہ دیویں
چن ٹھر جانڑا ای، مڑ نہ آکھیں
پتھرا، ڈُب کے توں ای مرنا اے
ککھ تر جانڑا ای، مڑ نہ آکھیں
توں آکھیں تے آ جانا میں
اودر جانڑا ای، مڑ نہ آکھیں
جے نہ چنگا پتر جمیا ای
اوتر جانڑا ای، مڑ نہ آکھیں
نیویں تھارے، اج لگدا اے
مینہ ور جانڑا اے، مڑ نہ آکھیں
میں نوں چا کے بھونویں تے ٹُرنا ایں
نگر جانڑا ای، مڑ نہ آکھیں
مینوں مار کے کنج لویں
میں کھلر جانڑا ای، مڑ نہ آکھیں
سولی دا سد سنڑن توں پہلوں
ناصر جانڑا ای، مڑ نہ آکھیں
رائے محمد ناصر خان کھرل
No comments:
Post a Comment
Note: only a member of this blog may post a comment.