وے کیہڑا ایں
وے کیہڑا ایں میرِیاں آندراں نال منحبی اُنڑدا
میرا دل داونڑ آلے پاسے رکھیں تے اکھاں سرہانے بنے
میں سرہانے تے پُھل کڈھنے نیں
دھرتی دی دھون نیوِیں ہووے
تے اوہدے تے اسمان نہیں چُکا دَئی دا
بابا کوئی کِیڑا کڈھ
کُرونڈیا ہووے تاں مینوں لڑا دئیں
میرا ای اے نا
تُوں آپے ای تاں آکھیا سی جے اسیں دِھیاں نُوں داج اِچ کیڑے
ای دینے آں، فیر دے دے
بابا! دِھیاں پُتر اِکو جیہے کیوں نہیں ہوندے
جے دِھی وَڈی ہووے تاں تُساں ٹُک ٹُک کے پُتر جیڈی
کر لیندے او
جے پُتر وڈا ہووے تاں دِھی فیر پَونی، فیر ادّھی، فیر کھنّی
بابا وے! سُولی تے سَپ چڑھیا ہنیری آونی ایں الاّں نُوں
گھبرا پیا پیندا اے
دِھیاں مر جانیاں نُوں گھبرا پیندا اے
جِیبھاں دی جھالر آلا فراک پا کے میں کندھ ٹپی
مینوں فیر وی بولنا نہ آیا
بابا وے بابا! دھرتی دی دَھون تے سَپ چڑھیا، ڈَب کھڑبا
وِیراں دِیاں دَھوناں تے سَپ چڑھیا
اسیں ادھیاں بھلیاں، اسیں پونیاں چنگیاں
ساڈی ڈھیری تے پیلُو پکیاں تے وِکدیاں وِکدیاں بزارے آ گئیاں
چوانیاں چبھ چبھ کے ساڈے دَند ٹُٹے
اساں کیہڑے دُدھ نوں روئیے
ڈِنگیاں چوانیاں دا بھلا کون بھان دیندا ای
ایہہ کون ایں میرے بھجے ہوئے پاسے بھنن آلا
وے میریاں اکھاں سرہانے بنے رکھیں
میں سرہانے تے پُھل کڈھنے نیں
سچجیاں دِیاں پوراں وِنھیاں ایس جہانے
رنگیا وے! ہتھ دھو لین دے
اِک ورھا میں ہور اپنے پِنڈے نالوں ٹُک لواں
تینوں پتہ نہیں اج میں جماعتے چڑھی آں
تے نالے ساڈی چِتری نے بچہ وی دِتا اے
تُوں کہنا ایں ہُن اسیں ایتھوں ٹُر جانا ایں
نہیں تاں ٹاہلیاں دا بُور جھڑن لگ پئے گا
تے راہ ڈکے جان گے
پر سَپّاں نُوں دھرتی دی راہ دے دیندی اے
اساں لنگھ جانا ایس دھرتی ہیٹھ سمائے کے ہیں بابا
میرے بچے مینوں موڑ دیں گا نا
آوندے ورھے ایہناں نُوں موتی دانہ نکلنا ایں تے توں آکھنا ایں
ٹِڈی دَل دوہتروان
دوہتروان بے ایمان
ساڈے کڈھے ہوئے سرہانے لے گئی تے نالے کھیس وی، تے
بُکلاں وی تے موسم وی
آؤندے ورھے نُوں تاپ چڑھے تے جاندے نُوں کوڑھ پوے
میرا اج میری تلی تے دھر دے بابا
میرا سچ میری تلی تے دھر دے بابا
ادھی راتیں فیر تُوں ماں نوں آکھنا ایں
داج آلے اندر سَوں جے دِھی ویاہونی اُو تے
تے آپوں میری بُکلے آ وڑنا اے
تے میں ادھی رات نہیں ہوون دینی
اج میری دَھون تے سَپ چڑھیا
نسرین انجم بھٹی
No comments:
Post a Comment
Note: only a member of this blog may post a comment.