جدید پنجابی شاعری
ٹُر پئیاں مُٹیاراں
دِن چڑھیا تے مِلّاں وَلّے ٹُر پئیاں مُٹیاراں
چوگ دی خاطر لین اُڈاری جُوں کُونجاں دیاں ڈاراں
جِیکوں چیتر رُتے کِھڑدی رنگلی ہرّی جوانی
اِنج حیاتی وِچوں پُنگری کومل کھری جوانی
ریشم وِچ نہ سانبھی جاوے اَتھری بھری جوانی
نیویں پا کے ٹُردی جاوے سہمی ڈری جوانی
وِنھّن جُثہ میلیاں اکھّاں جیکوں تیز کٹاراں
دن چڑھیا تے ملاں ولے ٹر پئیاں مٹیاراں
ایہہ ویڑھے دا سوہن سہپن سدا بہاری چھاواں
پیو دا شَملہ، ماں دی چادر، غیرت دا سرناواں
اس کلمُوہنی غُربت پاروں رُل گئیاں وِچ راہواں
کجّل دی تھاں نِیراں مَلّی، سُرخی دی تھاں ہاواں
سمے دی تِکھّی دُھپ نے لُوہیاں ایہہ تِلّے دیاں تاراں
دن چڑھیا تے ملاں ولے ٹر پئیاں مٹیاراں
وقت غلیل نے بھر بھر مارے مجبوری دے چِدّے
وِسّر گئے سبھ چرخے، پینگھاں، کِکلی، جھُمر، گِدّے
وِچ ترنجن سوانگ رچاؤنے مِل کے پُٹھے سِدّھے
ریجھاں چاواں دے پھُل بوٹے آن مشیناں مِدّھے
لوڑاں تھوڑاں نے کھوہ لئیاں کومل سوچ وچاراں
دن چڑھیا تے ملاں ولے ٹر پئیاں مٹیاراں
صنعتکار مہینے پِچھوں دیون جد مزدوری
گلّاں کرن سوالی اکھّاں پا پا مِٹھی گُھوری
نال شرم دے ڈُبدے جاوے انکھاں دی مجبوری
بُلھیاں تھِرکن جِبھ تھتھلاوے گَل نہ ہووے پوری
پیلے مُکھ تے پھِرے تریلی لے کے رنگ ہزاراں
دن چڑھیا تے ملاں ولے ٹر پئیاں مٹیاراں
سُن کے بُلھیاں سِیتی رکھن ایہہ لاڈاں دیاں پَلیاں
ہر افسر دے طعنے مِعنے گلّاں سَڑیاں بَلیاں
اج غیراں دی سہن کُڑتّن ایہہ مِصری دیاں ڈلیاں
تک چنبے دیاں چڑیاں گئیاں تَنداں دے وچ وَلیاں
بھات و بھات بناون وَرکر پئے کھمباں دیاں ڈاراں
دن چڑھیا تے ملاں ولے ٹر پئیاں مٹیاراں
شریف انجم
No comments:
Post a Comment
Note: only a member of this blog may post a comment.