جدید پنجابی شاعری
کِنے چنگے دن ہُندے سی
کَم کاج توں ویلے ہو کے
سگریٹ لا کے
تینوں چیتے کر کے اکثر
چِترا دی آواز چ شِو دی شاعری سُننی
جے کوئی سجن آ جانا تے
محفل جمنی
چاء تے بسکٹ، کدی کدائیں کُکڑ شُکڑ کھا کُھو لینا
موج تے مستی
رج کے ہسنا
پر خورے کیہ ہویا یکدم
تبدیلی دا بدل گجیا
بجلی لِشکی
مہنگائی دیاں کنیاں پئیاں
مگروں اینا ہُسڑ ودھیا
ہر اک شے دا چیتا بُھلیا
کم کاج توں اکثر ویہل اے
پر ہُن سگریٹ پین توں مینوں ڈر جیا لگدا اے
تیرا وی نہیں چیتا آندا
چِترا دی آواز وی چنگی نہیں لگدی
بُھل بھلیکھے جے کوئی سجن آ وی جاوے
مُشکل دے نال چاء ای لبھے
نہ بسکٹ نہ کُکڑ شُکڑ
نہ ای کِھڑ کِھڑ ہاسے
مایوسی ہی مایوسی اے ساڈے آسے پاسے
سچی گل اے بُھل گیا اے
ہُن تے رج کے سونا
ساڈے پلے کس ظالم نے
پا دتا اے رونا
احمد نعیم ارشد
No comments:
Post a Comment
Note: only a member of this blog may post a comment.