جدید پنجابی شاعری
کر کے اکھاں لال منائیاں شاماں
رو رو پورا سال منائیاں شاماں
سورج نوں جد مِلیا دیس نکالا
لوکاں دیوے بال منائیاں شاماں
انھیا دولت مندا توں کیہ جانے
کِتھے کِتھے کال منائیاں شاماں
ساڈے سِر وچ پا کے دِن دا گھٹا
مِتراں واہ کے وال منائیاں شاماں
کِنج سمجھاواں چنا تیرے باہجھوں
اساں کہڑے حال منائیاں شاماں
کئی ورھیاں توں کہنوں دسیے دل نے
خورے کیہ کیہ گال منائیاں شاماں
سجناں مُکھ پرتائیا تے میں خُرما
لہو دے گُھٹاں نال منائیاں شاماں
خرم چودھری
No comments:
Post a Comment
Note: only a member of this blog may post a comment.