توبہ
سچے رب دے قہر توں ڈریے
آؤ رل کے توبہ کریے
دُدھ وچ پانی پان توں توبہ
مجھیں ٹیکے لان توں توبہ
کُتے، کھوتے، کوہن توں توبہ
مویا ماس کھوان توں توبہ
شربت، جوس تے روہ دے ناں تے
کیمیکل پیان توں توبہ
چِھلڑ پہی کے چاہ دی پتی
مرچیں اِٹ رلان توں توبہ
ویسن دے وچ بورا پاکے
ہلدی رنگ رنگان توں توبہ
پھل نوں مٹھے ٹیکے لا لا
شیریوں شہد بنان توں توبہ
جعلی کڈھ کے نِت دواواں
ہر تھاں لُٹ مچان توں توبہ
چٹی وڈھی کھیسے پاکے
اپنے فرض بُھلان توں توبہ
اپنے لئی سفارش لبھ کے
دُجیاں دے حق کھان توں توبہ
ہر سودے نوں ویچن لگیاں
جھوٹیاں قسماں چان توں توبہ
سِدھی سِدھی راہ نوں چھڈ کے
پُٹھی راہ تے جان توں توبہ
گل دے نِت گلوڑ توں توبہ
کھنب دے ڈار بنان توں توبہ
واواں دی بدنامی کر کے
کالے چن چڑھان توں توبہ
نِیّتاں وچ فتور وساکے
لوبھ گُھمنڈ گُمان توں توبہ
اپنے گھر دے چانن خاطر
تھاں تھاں نھیر ودھان توں توبہ
کُوڑاں دی پنڈ سِر تے چاکے
سچی گل لُکان توں توبہ
رجے بُھکھے ڈھِڈ دے پِچھے
ماڑے دی کھل لاہن توں توبہ
پیراں تھلے رول کے ہاسے
سُچے جذبے گاہن توں توبہ
گلیں باتیں اگلے اُتے
اَیویں رُعب جمان توں توبہ
مُنہ تے روز خوشامد کرکے
دِلاں چہ زہر ودھان توں توبہ
سانجھاں اُتے پانی پاکے
ویر دی اگ بھکھان توں توبہ
مطلب دے لئی یاری لاکے
سکے وِیر لڑان توں توبہ
بے وس تے مجبوراں اُتے
نِت نِت ظُلم کمان توں توبہ
اپنے اپنے جیون دے لئی
جیوندیاں نوں دفنان توں توبہ
سچے رب دے قہر توں ڈریے
آؤ رل کے توبہ کرئیے
ارشاد سندھو
No comments:
Post a Comment
Note: only a member of this blog may post a comment.