شِخر دوپہر سر تے میرا ڈُھل چلیا پرچھاواں
قبراں اُڈیکدیاں مینوں جیوں پُتراں نُوں ماواں
زندگی دا تھل تپدا کلے رُکھ دی ہوند وِچ میری
دُکھاں والی گہر چڑھی وگے غماں والی تیز ہنیری
میں وی کیہا رُکھ چندرا جہنوں کھا گئیاں اوہدیاں چھاواں
قبراں اُڈیکدیاں مینوں جیوں پُتراں نُوں ماواں
ہجراں چہ سڑ دے نے سکھے روٹ تے سکھیاں چوریاں
عمراں تاں مک چلیاں پر مکیاں نہ تیریاں وے دوریاں
رج رج جھوٹھ بولیا میرے نال چندریاں کاواں
قبراں اُڈیکدیاں مینوں جیوں پُتراں نُوں ماواں
لوکاں میرے گیت سن لئے میرا دکھ تاں کسے وی نہ جانیا
لکھاں میرا سیس چم گئے پر مکھڑا نہ کسے وی پچھانیا
اج ایسے مکھڑے توں پیا اپنا میں آپ لکاواں
قبراں اڈیکدیاں مینوں جیوں پتراں نں ماواں
شِخر دوپہر سر تے میرا ڈُھل چلیا پرچھاواں
شو کمار بٹالوی
