اوچ نیچ پھر کیوں اے جیکر سبھ دا دیون ہار اے اکو

 جدید پنجابی شاعری

اوچ نیچ پھر کیوں اے جیکر، سبھ دا دیون ہار اے اکو 

داتا دا دربار اے اکو،.. اوہ سچی سرکار اے اکو

اک نوں لگے ہاسیاں ورگی، اک نوں ہاواں ورگی لگے

دل دا موسم اپنا اپنا، گھنگھروں دی چھنکار اے اکو

اس دے پیار دی تانگھ نے میتھوں، پیارکرایا ہر بندے نوں

ونڈ چھڈیا جس نوں ناواں وچ، جےسوچو تاں پیار اے اکو

جتھے لبھی چھاں اتھے ای بہہ گئی آں

 جتھے لبھی چھاں، اتھے ای بہہ گئی آں

عشق ہراں دے اوکھے پینڈے پے گئی آں

ایہہ نہ سمجھ تِرا ہتھ میتھوں اتے وے

تینوں اپنا سمجھ کے، جرم وی سہ گئی آں

اوہنوں سنگی سمجھ سامان چکایا سی

اوہ نس گیا، میں کھلی کھلوتی رہِ گئی آں

میرے حال تے انج سی یاراں دا ہاسہ

 میرے حال تے انج سی یاراں دا ہاسہ

جِیوں چِڑیاں دی موتے گنواراں دا ہاسہ

کدی زندگی موت دی جنگ دے وِچ

تُوں تکیا ای ہوسی بیماراں دا ہاسہ

عالیہ بخاری ہالہ