Showing posts with label سائیں غلام حیدر. Show all posts
Showing posts with label سائیں غلام حیدر. Show all posts

Friday, 30 September 2016

اناالحق دِی اوہ گل پچھدے میں پلڑا کھساں کیہ دساں

انّاالحق دِی اوہ گل پُچھدے، میں پلڑا کھسّاں کیہ دَسّاں؟
دسّاں تفسیر محبّت دِی، میں جانڑ کے پھسّاں کیہ دسّاں؟
ٹُٹنڑاں سہرے دِیاں لڑیاں دا، معصُوم اؤلاداں دا گُستان
کربل دے وِچ سیّداں نُوں، پانڑی دِیاں تَسّاں، کیہ دسّاں؟

تندوں کچیاں پیار پریت دیاں اے پر تگدیاں تگدیاں تگ گئیاں

تندُوں کچیاں پیار پرِیت دِیاں، اے پر تگدیاں تگدیاں تگ گئیاں
میرے دل وِچ تیرے نام دِیاں، شمعاں جگدیاں جگدیاں جگ گئیاں
گل رانجھنڑے دِی، قِصّہ قیس والا، میں تے دَسیا نال اشاریاں دے
ایہہ اکھّاں گل نہ سمجھ سکیاں، آخر لگدیاں لگدیاں لگ گئیاں

ناداناں دیاں یاداں اندر، گم سم ہو کے رہنڑا اوکھا

ناداناں دِیاں یاداں اندر، گُم سُم ہو کے رہنڑاں اؤکھا
دھوکھے بازاں نُوں بھُل جائیے، جان کے دھوکھا کھانڑاں اؤکھا
عِشق اوہدے دِیاں راہواں دِے وِچ، کے کھویا تے کے پایا
ڈوھُنڈھنڑ والے آپ گواچے، آپ گواچ کے پانڑاں اؤکھا

کیتے ہوئے کسے دے احسان بھل گئے نیں

کیتے ہوۓ کِسے دے احسان بھُل گئے نیں
میں تے آکھاں سارے انسان بھُل گئے نیں
صاحباں وانگوں دِسدیاں ہِیراں دِیاں یاریاں
رانجھے وی تے ونجھلی دی تان بھُل گئے نیں

ہِک واری آجا نئیوں چنگیاں دوپھیڑیاں

ہِک واری آجا نئیوں چنگیاں دوپھیڑیاں
ہر ویلے رہندیاں نیں سوچاں مینوں تیریاں
"بھُل گئیاں دُنیاں نوں قِصّے تے کہانیاں"
کردے نیں لوکی گلاں تیریاں تے میریاں

Thursday, 20 August 2015

کے کراں انہاں اکھیاں دا بدنام کریندیاں ہن

کے کراں انہاں اکھیاں دا بدنام کریندیاں ہِن
جہڑی گل تے پانواں پردے سرِعام کریندیاں ہن
انگ انگ سوہنا دلبر دا پر اکھیاں دی سرداری
جے کھلن دِن چڑہدا اے، بند شام کریندیاں ہن
در در پِننڑاں پاؤندا یارو ہتھ وِچ نپ کے کاسہ
ایہہ وقت دے شاہنواں نوں نیلام کریندیاں ہن
نہ ایہہ تیر تے نہ ایہہ خنجر نہ ایہہ ہن تلواراں
نہ کوئی سٹ تے پھٹ لگدا قتلام کریندیاں ہن
ہاسیاں بدلے رونے حیدرؔ پیار دے بدلے جھیڑے
خُوشیاں منگاں، درد اگوں اِنعام کریندیاں ہن

سائیں غلام حیدر

ریہہ گیا اے ادھ وچالے چامل میریاں چاہواں دا


ریہہ گیا اے ادھ وِچالے چامل میریاں چاہواں دا
ہن تے ایر نئیں نظرِی آؤندا مینوں اوہدیاں راہواں دا
خوشیاں نے تے لوکاں بھانڑے تھاں تھاں ڈیرے لائے نیں
ساڈے بھانڑے مِٹ گیا نام نِشان گِرانواں دا
گڈنڑ گوڈنڑ پالن والے مینوں نظری آؤندے نئیں
خصماں باہجوں ہوندا یارو ہر کوئی وارث چھانواں دا
باگاں دے وِچ بلبل ویکھی روندی تے کرلاندی میں
اندروں اندری کھاہدی جاندا اوہنوں خوف خِزاواں دا
اوہدے سینے اتے پلیا راکھا اوہدیاں عزتاں دا
مینوں لوکی مانڑ اکھیندے دھرتی ورگیاں مانواں دا
خؤرے کِہڑی مِٹی وِچوں اج دے گبھرو جمے نیں
بے غئیرت تے ہو نئیں سکدا پتر پنج دریاواں دا
جھکاں گا نئیں غیر دے اگّے، سِر دِی کوئی پرواہ ناہیں
مینوں واقِعہ بھل نئیں سکدا کربل دے صحراواں دا
سچ سیانڑے آکھن یارو کئی واری ازمایا اے
آخر ہِک دِن ٹٹ کے رہنڑاں انھاں زور ہواواں دا
حیدؔر سائیاں عملاں باہجوں کے کجھ پلے پاویں گا
کھا گیا اے عمر اساڈی ایہہ احساس گُناہواں دا

سائیں غلام حیدر

سسی تسی تھل مارو تے ہوکے ہانواں لکھیے


سسی تسی تھل مارو تے ہوکے ہانواں لکھیے
کچے اتے ٹھِلدی سوہنی وِِچ چنہاواں لکھیے
بے کاجی دے ہتھوں کامے مرن کنارے اپڑے
بھکھ دیاں ڈینڑاں دا فیر یارو ناں پرچھانواں لکھیے
منیاں اپنا دیس تے ہوندا سکھاں دا پرچھانواں
مارو شِخر دوپہراں نوں کِنج ٹھنڈیاں چھانواں لکھیے
ہسدے ہسدے کھیڈی جاندی لہو دی ہولی ایتھے
خود غرضی دیاں نازل ہوئیاں فیر بلاواں لکھیے
دکھاں دے میں پتر لکھاں جد وی کسے سیانڑے نوں
تیرا ناں ای لکھیا جاوے جو سر نانواں لکھیے
تیریاں گوریاں بانہواں نوں میں ہار پھلاں دے آکھاں
یا فیر ہار پھلاں دے تیریاں گوریاں بانہواں لکھیے
جیہڑے ایتھے دِن دیہاڑے دِل تے ڈاکے مارن
کیہ تعزیراں لائیے اوہناں، کیہ سزاواں لکھیے؟
دَل دے کولوں پچھو خاں کشمیر اساڈا وِیر نئیں؟
کھوہے دے وِچ سٹیا یوسفؑ فیر بھراواں لکھیے
تک چڑہدے پنجاب دے واسی لبھدے اپنے پنڈے نُوں
کیوں نہ اسیں انہاں نوں اپنیاں وڈھیاں بانہواں لکھیے
جے ربّ حق پچھاننڑ والی دیوے اکھ اسانوں
اِیدوں ودھ نہ حیدرؔ سائیاں ہور دعاواں لکھیے

سائیں غلام حیدر

دنیا دارو رج وڈیائیاں کر ویکھو


دنیا دارو! رج وڈیائیاں کر ویکھو
دھرتی اتے ہور تباہیاں کر ویکھو
اپنڑے یاراں نال بھلائیاں کر ویکھو
رب سوہنڑے دے نال شنائیاں کر ویکھو
ہِک دیہاڑے کرنی بھرنی آوے گی
کجھ تے نیّت نال کمائیاں کر ویکھو
تیرے بارے ساری دنیا سوچے گی
اپنڑیاں سوچاں سبھ پرائیاں کر ویکھو
ہو سکدا اے درداں نوں محسوس کرے
لمیاں اوہدے نال جدائیاں کر ویکھو
اساں تے فِر وِی دِل دا بوہا ڈھونڑاں نئیں
بھانویں جیڈیاں بے پرواہیاں کر ویکھو
چھوڑو سائیں روپ بہروپ دِی رسماں نوں
عِشق دے ویہڑے قلب صفائیاں کر ویکھو

سائیں غلام حیدر

Sunday, 29 December 2013

سانوں کَلیاں چھڈ پردیس گیوئیں

سانُوں کَلیاں چَھڈ پردیس گیوئیں، تُوئیں عشق نُوں لائیاں لِیکاں
تارے عرش تے ڈانواں ڈول ہو گئے سُن میں بے وَس دِیاں ڈِیکاں
ہَتھ رَکھ کے ڈُبدیاں نَبظاں تے کِیتے ترس پئے ڈھیر شریکاں
لاوارث سمجھیا سائیں حیدرؔ تیرے شہر دیاں وسنیکاں

سائیں غلام حیدر

انج دا نقطہ دسیا اوہنے عقلاں دی مت ماری گئی اے

اِنج دا نُقطہ دَسیا اوہنے عقلاں دی مَت ماری گئی اے
جو سُنیا نئ، پَلّے پئیاں، جو آکھی اوہ یاد نہ رئی اے
سو گَلّاں دی اِکّو گَل اے، جہڑی ساڈے پَلّے پئی اے
صُورت جس پکا لئی حیدرؔ، اوہا جان سہاگن تھئی اے

سائیں غلام حیدر

دوائیاں دیندے طبیب ڈٹھے

دوائیاں دیندے طبِیب ڈِٹّھے
نصیحتاں کردے خطِیب ڈِٹّھے
پیار ڈِٹّھے نیلام ہوندے
جَگ تے وِکدے ضمیر ڈِٹّھے

سائیں غلام حیدر

چا، چا، بھارا جے چاون ہوندائی

چاء، چاء، بھارا جے چاون ہوندائ
چَھڈ کے سنگتاں جے آون ہوندائ
روسا کائی نئیں، منِیں میں پوساں
جے ڈَٹّھے پئے نُوں اُٹھاون ہوندائ

سائیں غلام حیدر

بے وس ایہہ گل سوچنڑ اتے دنیا دا ہر بندہ

توحید

بے وس ایہہ گل سوچنڑ اُتّے دُنیا دا ہر بندہ
کوئی تے ہے چلاونڑ والا اِس دُنیا دا دھندہ
چار چومُکھّی پانڑی اُتّے کِس نے فرش ٹِکایا
سینساں دسّنڑ مِٹّی نُوں چا گوشت وانگ بنایا
تیلا، مائیں، ککّی کیڑی، ہاتھی، شیر، بھِگیاڑ
ہور ہزاراں جُوناں نالے مِٹّی، ریت، پہاڑ
رُتّاں، ویلے، بدّل، واواں، دِن، دِیہاڑے، راتاں
کِہڑی کِہڑی گِنڑ کے دسّاں ون و ون سوغاتاں
میوے، بُوٹے، پُھل ہزاراں رنگ و رنگ کھِڑائے
وکھّو وکھ تاثیر ایہناں دِی، وکھّو وکھ بنڑائے
سینساں جِتنا زور لگاونڑ بن نئیں سکدی مکھّی
ہِک قطرے وِچ پیدائشاں دِی قُدرت کِس نے رکھّی
دُنیا دِی ہر شئے دِی مِٹّی کِس بُنیاد بنائی
ہر بندے نُوں منڑاں پؤسی ہِکّو ذات اِلٰہی
جے ہِکّی توں چوکھے ہوندے بھانویں ہوندے دو
فیر سیاستداناں والے لگّے ریہندے شو
آپو اپنڑی گل تے اڑدے آپو اپنڑی کردے
فیر نہ چن تے سُورج ایتھے ویلے دے سِر چڑھدے
ہر بندے نُوں منڑاں پیندائے واحِد مالِک اللہ
ایدوں ودھ کے سوچنڑ والے عقلاں دے سِر کھلّا
ہِک ہِکلّے کِتھّے کِتھّے جھوکاں نئیں وسائیاں
گُجھیاں بھیداں اُتّوں پردہ چا نئیں حیدرؔ سائیاں

سائیں غلام حیدر

مستقبل دِی کر کوئی گَل

مُستقبِل دِی کر کوئی گَل
گئے ویلے تے ہَتھ نہ مَل
موت اے راکھی زِندگی دِی
سو گَلّاں دِی ہِکّو گَل
عاشِق دِی میراث اے یارو
جنگل، بیلے، جَل تے تَھل
دِل دِی کھیتی عمل دا جوڑا
نال یقین چلائیے ہَل
تیرے وعدے زِندگی میری
تیری مرضی وَل نہ وَل
پیار دِیاں نیں اوکھیاں راہواں
چَل تے سوچ سمجھ کے چَل
درد سجن دے مار مُکایا
اوکھا گُزرے اِک اِک پَل
عاشِق ڈِٹھّے سُولی چڑھدے
عاشِق لوک لوہاندے کَھل
سائیں حیدرؔ جی سُتّی سَسڑی
تَھل وِچ گولے یار پُنل

سائیں غلام حیدر

جد درد دا دارو نئیں بنڑدے

جد درد دا دارُو نئیں بنڑدے، مین ہور حبِیباں کیہ دینڑاں
انڑ واقِف ہجر دے درداں توں، بدنام طبِیباں کیہ دینڑاں
ناسمجھ سجنڑ کُجھ سمجھ تاں سہی، میں کِیہڑی چیز لُکائی بیٹھاں؟
کائنات دِی قِیمت دِل ہوندا، تینُوں ہورغرِیباں کیہ دینڑاں
مین یار دا وِیہڑا عرشِ اولیٰ، اوہدی دِید عِبادت میری اے
جئیں عِشق دا قائدہ پڑھیا نئیں، اوہنُوں درس خطِیباں کیہ دینڑاں
میں سُکھ تے چین ونجائی بیٹھاں، میرے واسطے جگ وِیران ہویا
جِہنُوں اپنڑے سُکھ نئیں دے سکدے، اوہنُوں درد رقِیباں کیہ دینڑاں
سائیں حیدرؔ، نہ تخت بخت، نہ صِحت سکُون، نہ زر منگداں
جداں یار دِی دِید نصِیب نئیں، مین ہور نصِیباں کیہ دینڑاں

سائیں غلام حیدر

گلاں سنگ سجن دے کریے

گلّاں سنگ سجن دے کریے بہہ کے کل مکلّے
جھلّا آکھن والے سانوں سارے لوکی جھلّے
جِنہاں ہوش بے ہوشی بعدوں جگ تے حاصل کیتی
کلا میں نئیں لوکاں بھانڑے سارے جھل وللّے
بدنامی دے خوفوں اوہنوں کوئی تحریر نہ لِکھی
مجبوری توں کانواں ہتھّیں ڈھیر سُنہڑے گھلّے
پِچھّو کنڈی نِت رُسیمے ساہنویں نِت رساوے
سچ سیانڑیں آکھن یارو عاشق لوگ دو گلّے
عِشق محبت والا کِرلا پھاتھا سنگھ اساڈے
نہ سُٹّن نہ نِگلن جوگے پھاتھے آنڑ کولّے
اپنی ضِد توں دُنیا اُتّے ہر شے پرکھی جاوے
قارون، فِرعون، یزید، شمر دے ساڈے سر تے بھلے
پندرہ آنے حق سمجھ کے پیندے خُون اساڈا
آنہ ہِک روپیّے سیتی مزدُوراں دے پلّے
اسی کیہ آں، دُنیاں اُتّے ولیاں نئیں پچایا
دوں کماناں وِچوں جیہڑہ تیر جِگر تے چلّے
اج وِی حیدرؔ سائیں دا سینہ، پِیڑاں نال دلیندا
ٹھیک دوپہرے ملہیاں دے وِچ جاں کوئی ساہو ہلّے

سائیں غلام حیدر