میرے یار دا روپ سنگھار عجب رخسار عجب انوار عجب

 میرے یار دا روپ سنگھار عجب، رخسار عجب، انوار عجب

اوندے نین بے چین، خمار عجب، اوندی پائل دی جھنکار عجب

سرکار عجب، گفتار عجب، اقرار عجب، انکار عجب

اسرار عجب، ہوشیار عجب، واہ عابد دا دلدار عجب

عابد تمیمی

مینوں ترسن تے ہن تس آندا اے دلدار بشارت دے چا

 مینوں ترسن تے ہُن تس آندا اے دلدار بشارت دے چا

میری ہنج مشہور فقیرنی اے جھٹ کانڑ صدارت دے چا

جے دل دا نہوں کشمیر دیندا وت کُل و ہُم بھارت دے چا

اسی عابد کافر ہوئے ودے ہائیں ہک وار زیارت دے چا

عابد تمیمی

سر ہجر دی دھپ تے پیروں واہنڑی رہی بھجدی

 سر ہجر دی دُھپ تے پیروں واہنڑی، رہی بھجدی مارو تھل اچ

شوہدی روندی کیچ دا ناں چا کے دوئیں باہیں پا آپنڑے گل اچ

را عابد اجنڑ وی ڈر لگدائے، جہڑا رہی اے دشت جنگل اچ

ناہی چم چم تھکدی خاک اُٹھاں دی، کائی گل ہائی خان پنل اچ

عابد تمیمی

فرعون وقت دا شہر پنایا ای بھلا اساں کدن وسدی جاگیر ہائیں

 فرعون وقت دا شہر پنایا ای بھلا اساں کدن وسدی جاگیر ہائیں

سانوں ڈٹھیاں ماضی یاد کریسیں بھلے وقتاں دی تصویر ہائیں

خیرات دے طور تے عابد ہس پوہ تیری اکھایاں دی توقیر ہائیں

بک پیٹھی ہوئی کنک دا واپس لے لےبھلا اسیں کوئی عام فقیر ہائیں

عابد تمیمی

ایدے نت پیغام انجام دے قاصد اودے خیر منگیندی وتی

 ایدے نت پیغام انجام دے قاصد اودے خیر منگیندی وتی

ایدے ہر حسرت توں کفن چھکی گئے اودے ذات کجیندی وتی

ایدے بیوہ اکھ دے اتھرو سک گئے، ادے اکھ پرنیندی وتی

ادے سنگت دے عابد چہلم ہو گئے ادے عید منیدی وتی

عابد تمیمی

ناہی کدی کاہنات تے تک پوندی آہی مانڑ جناب دے سنگ دا

 ناہی کدی کاہنات تے تک پوندی آہی مانڑ جناب دے سنگ دا

ہاہی چن وی چڑھدا ریس کریندا توہیں سجن دی ترٹی ہوئی ونگ دا

تسیں رنگ پور ہو کسے رنگ دے وچ ہتھ نپ لویں آ بے رنگ دا

اساں عابد کر تسلیم لیا اے، کر معاف شہزادہ جھنگ دا

عابد تمیمی

میرے مولا عطا کر تخیل گری

 میرے مولا عطا کر تخیل گری میرے غربت کده تے صنم آونڑاں اے

مثل فردوس دھرتی دا سینہ ہووے بے نظر کول نظر کرم آونڑاں اے

پربتاں دی بلندی نوں بدل چمنڑ کجھ معطر فضا وچ موسیقی ہووے

تارے لڑیاں تے سورج ڈهونڑ عرش توں ہر سجاوٹ دے وچ ہر باریکی ہووے

رنگ برنگی ہوواں دا آنچل ہووے، موج فطرت دا منظر حقیقی پووے

ہر ہتھیلی تے چندن دی مہندی ہووے لیک بخت سکندر دی لیکی ہووے

ہر زبان تے اعلانے بشارت ہووے انہاں آونڑا اے خدا دی قسم آونڑاں اے

میرے مولا عطا کر تخیل گری میرے غربت کده تے صنم آونڑاں اے

سچ دا عابد اصول ہک اے پگڑی راہندی اے سر نئیں ہوندے

 درست ذہناں نوں چر نئیں ہوندے

حب دے دعوے محب نئیں ہوندے

سچ دا عابد اصول ہک اے

پگڑی راہندی اے سر نئیں ہوندے

عابد تمیمی

میری اکھیاں گداگر نئیں سخاوت کردیاں مویاں

 میری اکھیاں گداگر نئیں سخاوت کردیاں مویاں

بنا کے جملے ہنجواں دے 'تُو آ وت' کردیاں مویاں

اوندی تصویر کو عابد، نظر چُمدی ختم ہو گئی 

ایدا مطلب تے اے ہویا، تلاوت کردیاں مویاں 

عابد تمیمی

دعویٰ اے مرا یار کدیں یاد کریسیں

 دعویٰ اے مِرا یار کدیں یاد کریسیں

بے لوث مِرا پیار کدیں یاد کریسیں

گھبرایا نئیں ظلماں توں زندگی دا جواری

کیڈا ہائی وفادار کدیں یاد کریسیں