رنگ وطن: فرخ ہمایوں

Showing posts with label فرخ ہمایوں. Show all posts

Wednesday, 3 May 2023

سورج ولے کنڈ کراں تے پیر پھڑے پرچھاواں

اندر و اندر گڑھکاں کھولاں وچو وچ کُرلاواں

اُبل پاں تے جنگل بستی ساڑ سواہ کر جاواں

میں توں میں دا حال نہ پُچھو میں، میں توں گھبراواں

میں میں نوں میں اپنے اندر لکھ واری دفناواں

دُکھاں دے ہڑ

دُکھ سَدھراں دے

ہڑ درداں دے

بُک بُک اتھرُو

وچ اکھیاں دے

عمروں لمّی رات ہنیری

دل دی کتاب

دل دی اک کتاب دا

ورقہ ورقہ آپ کتاب

لمّی پھکڑی اُچیاں عزتاں

خوشیاں غمیاں ہاسے پیڑاں

گنجل ہیرو پھیر لکیراں

ایہدیاں کون کرے تفسیراں

جیون لئی رب سانوں دِتے چار دیہاڑے

بنڑدے ٹُٹدے اُٹھدے ڈِگدے لنگھے چار دیہاڑے

پھردے رہے سِر مٹی پا کے ننگے چار دیہاڑے

لبھ لبھ لیراں، لَتے، کِھنو ڈنگے چار دیہاڑے

دو گُھٹ پی کے جے خوشیاں نال رنگے چار دیہاڑے

ساقی کھوہ کے لے گئے لوکی، منگے چار دیہاڑے