سکندر دا قول
ادھ جہان دی
جت کے اوڑک
خالی ہتھیں
جانا اے
شاہدہ دلاور شاہ
جو غصے نال نہ جکڑن ہووے
اہنوں پیار دے نال لہویٹ لئیے
شاخاں تے مہکدے رہن دئیے
پہلاں ڈُلہے پھل سمیٹ لئیے
شاہدہ دلاور شاہ
اپنی اپنی واری
سو سو واری
پُتر پُچھے
دس وے ابا! اوہ کیہہ اے؟
سو سو واری
ابا دَسے
عورت کول ہُن ٹیم نہیں ہوندا
دُلے بھٹی جمّن دا
بیوٹیشن توں ویہلیاں ہو کے
ون سونّے فنکشن ویکھن
ریہندا جھیڑا مار مُکایا
چابی والی گولی نے
جد اکھ لگی
صدیاں دے جگراتے نیں
جد اکھ ذرا کو لائی
اوسے لمحے
رات دی رانی
ویلا بھال کے مہکی
کَلا رُکھ
جے میں رونواں
اوہ وی رووے
جے میں ہَساں
اوه وی ہَسے
کِسے نُوں بُھلن دیوے
اکّویں صدی وچ کنج آئے
عدل، اصول، قرآن، ایمان
پِچھے سُٹ کے ریتاں نوں
کیبل، چیٹنگ، گندیاں فلماں
قبلہ کعبہ یورپ کر کے
اکویں صدی چہ آئے آں
اسٹمک پرابلم
مرچاں اندر روڑے پِلے
دُدھ وِچ پانی چھپڑ دا
زہر ملاوٹ دا ایہہ سارا
معدے اندرآ اپڑدا
بند اکھاں تے کنِّے چپّے
مارکس شیٹ
راتاں نوں میں
اوہدی یاد دے
رٹے گھوٹے لائے
دناں نوں اوس سلیبس دا میں
اک نہ چھڈیا پرچہ