Showing posts with label استاد کرم امرتسری. Show all posts
Showing posts with label استاد کرم امرتسری. Show all posts

Monday, 28 June 2021

ایسے سخت سیاہ سن عمل میرے

ایسے سخت سیاہ سن عمل میرے

کہ میں ٹھوکراں تھیں پائمال ہوندا

پُرزے پُرزے کر چھڈدے لوک مینوں

جُدا جُدا میرا وال ہوندا

پتھر برسدے وانگ منصور مینوں

گریبان دامن میرا لال ہوندا

جے نہ رب دی ذات رحیم ہوؤندی

کرم ویکھدوں کیہ تیرا حال ہوندا


استاد کرم امرتسری

Monday, 15 January 2018

چلھے دے وچ ای اگ میاں

 چُلھے دے وِچ ای اگ میاں

جیویں سر دے اُتے ای پگ میاں 

ماں روٹیاں پئی پکاؤندی اے 

پھپھی گُڈیاں پئی بناؤندی اے


استاد کرم امرتسری

تنگ آ گیا اوہدیاں لاریاں توں

تنگ آ گیا اوہدیاں لاریاں توں
اج، کل، گھڑی، پَل، دس گیا
اک دن گھرے سی اوہ اتوں جا پیا میں
مجبور اوہ اندرای پھس گیا 
بُوہا ہور پچھواڑیوں کڈھ  لِتا
اوہنوں کوئی استاد ہے دس گیا

جن وانگ مینوں چمبڑ گیا یارو

جِن وانگ مینوں چمبڑ گیا یارو

کاہنوں عشق کمبخت نوں چھیڑیا میں

کدی سکھ دا ساہ نئیں لین دیندا

دِق جیہا ایہہ روگ سہیڑیا میں

مینوں معاف کر چھڈ دے جان میری

توبہ بُھلیا عشق بکھیڑیا میں

دے کے دل بچا لتی جان کرمؔ

قصہ اس طرح نال نبیڑیا میں


استاد کرم امرتسری 

ایس عشق ملاح نوں ویکھیا ای

ایس عشق ملاح نوں ویکھیا ای
مینوں آر دتا اوہنوں پار دتا
ایس بحرِ محبت دے وِچ یارو
مینوں ڈوب دتا اوہنوں تار دتا 
توبہ ہجر تندور وِچ کیہہ آکھاں
مینوں ساڑ دتا اوہنوں ٹھار دتا 

اج میں اوہ سیاپا مکایا اے

اج میں او سیاپا مُکایا اے
ساری عمر سی بیٹھ کے رون والا 
دامن لیا بچا اس داغ تھیں میں
حشر تِیک سی بیٹھ کے دھون والا 
اوہدی اکھ بچا میں بھج آیا
اج مُل پیا سی دل کھون والا
کرم کم ہویا اج اوہ میتھوں
جہڑا رستم توں نئیں سی ہون والا

استاد کرم امرتسری

پانی وانگ سی بخت جماؤندا کیہہ

پانی وانگ سی بخت جماؤندا کیہہ
ایس کم بخت نوں لگ دی جاگ نئیں سی
کنداں بناں ہُندے گھر عاشقاں دے
کوٹھی کوئی محل کوئی باگ نئیں سی
شِبو موتیا نرگس گلاب کتھے
میرے گھر وچ تے سُکا ساگ نئیں سی
جس دن اوہ آئے کرم گھر میرے
خالی گھڑا سی، جلدا چراگ نئیں سی

استاد کرم امرتسری

باگ= باغ
چراگ=چراغ

مل گیا اے یار دا دیدار مینوں

مل گیا ہے یار دا دیدار مینوں
سارا مال دے کے نالے جان دے کے
لبِ لعل خریدیا میں اوہدا
اپنی ہستی دی ساری دکان دے کے
راضی کر لیا جس طرح ہو گیا اوہ
جو کھچ وچ سی میرے امکان دے کے
بُتاں تیک تے میں کرم پہنچ گیا
اپنا دین دے کے تے ایمان دے کے

استاد کرم امرتسری

تیری نظر تغافل نے غضب کیتا

تیری نظرِ تغافل نے غضب کیتا
بڑا ستم تیرے انتشار کیتا
کالے وعدیاں وچ سفید ہو گئے
ایتھوں تیک تیرا انتظار کیتا
اچھا بہت اچھا، ہاں ہاں کیتا
تُساں جدوں کیتا انکار کیتا
کرم عاشق دے صبر نُوں ویکھیا ای
نہ اظہار کیتا نہ اصرار کیتا

استاد کرم امرتسری

نئیں سفر سامان درست کیتا

نئیں سفر سامان درست کیتا
کیہہ کراں گا خاک وِچ رلیا میں
جی چاہوندائے پاڑ کے پُھوک سٹاں
تینوں کی کراں گا خالی پلیا میں
فرصت ہوؤندی تے کجھ بنا لیندا
تھوڑے وچ کیہ کردا جھلیا میں
جد میں آیا تے کرم اذان ہوئی
ہو گئی نماز تے چلیا میں

استاد کرم امرتسری