رنگ وطن: تنویر شاہد

Showing posts with label تنویر شاہد. Show all posts

Thursday, 5 October 2023

جدید پنجابی شاعری

دل دِیاں لگراں تے بُور جدوں پے جائے

پل دی وی دُوری کولوں دل اے تریہہ جائے

ہجر والا ناگ جد پنڈے نال کھہہ جائے

چُوری والا چھنّاں فیر ہتھ وچ رہ جائے

اُڈّن توں پہلاں اِک کاں کُجھ کہہ جائے

آس دا بنیرا آپوں ہولی ہولی ڈھہہ جائے

پیار دی تختی لِکھن ناں ہوئی

بیٹھے گاچی ملدے رہ گئے

تیرے تِیک اپڑاون والے

پینڈے سانوں دلدے رہ گئے

عشق کمینہ! لارے لاوے

اِک دو ٹِبے تھلدے رہ گئے

پیار دی رَتّی بھاری ہوندی

نفرت پاویں تولہ ہووے

سچ دی تکڑی کی اُس تُلناں

جیہڑا اندروں ہؤلا ہووے

تنویر شاہد

دھرم

پینڈا لماں، سوچدا جاواں

کیویں جِندڑی نال ہنڈاواں

راہی اپنی راہیں مُڑ گئے

چھڈ گیا ہتھ، میرا پرچھاواں

توں وی کلّا، میں وی کلّا

کلیاں دا اک دھرم بناواں

کِیڑے نُوں تُوں پج کے دیویں

دل نوں جد اک اکھ نے چُکیا تھلیا سی

عشق دی چکی وریاں سانوں دلیا سی

اساں پرائیاں اکھیاں توں نئیں لٹنا سی

گھر دا جی وی کوئی اونہاں نال رلیا سی

سب توِیت تے ٹُونے، تاگے کر ویکھے

اس بیدرد دا درد ناں فیر وی ٹلیا سی