Showing posts with label مسعود منور. Show all posts
Showing posts with label مسعود منور. Show all posts

Monday, 20 March 2023

سدھا لبھ گیا راہ ڈھولا

 ماہیا ٹپہ


سِدھا لبھ گیا راہ ڈھولا

مُلاں کولوں کیہ پُچھنا

ساڈا عشق نکاح ڈھولا


مسعود منور

Saturday, 19 November 2022

ہک دوجے نوں وڈھ وڈھ کھائی جاندے نیں

 ہک دُوجے نوں وڈھ وڈھ کھائی جاندے نیں

جِندڑی دی ہر لیک مٹائی جاندے نیں

مُورکھتا دی کُتی ات پئی جمدی اے

انھی کٹک کُتیک ودھائی جاندے نیں

بھن تروڑ دے ڈھیکے کر کر خرمستی

اُمت دی تاں کھیہہ اُڈائی جاندے نیں

Wednesday, 10 August 2016

ہائے ہائے میرا یار گواچا سانولڑا دلدار گواچا

ہائے ہائے میرا یار گواچا،۔۔ سانولڑا دلدار گواچا
دل دی گھمن گھیری دے وچ دریا دے وِچکار گواچا
سدھراں دے سیکاں وِچ بل کے ویکھ لیا ای کیہ ہویا اے
میرے سب انکار گواچے، تیرے گل دا ہار گواچا
چل مسعود! امین مغل توں گل اچیچی پچھ آواں میں
انگلیڈاں وچ کیہ لبھدے او، یار تے راوی پار گواچا

مسعود منور

Friday, 31 October 2014

سونہہ تیری مترا

سونہہ تیری مِترا 

 اَج توں پِچھے چُوں نہیں کرنی
ہاہ نہیں بھرنی
اپنے اندر بھانویں کِنّی ٹُٹ بھج ہووے
کھڑک نہیں کرنا
چُپ چُپیتے، دُکھ دے رُکھ دے کنڈے چُگنے
رون نہیں رونا
من دے مرن دا وین نہیں کرنا
بھانویں اِکلاپا پیا تن دی تند مروڑے
کسے نشیلی اکھ توں بھورا مہر نہیں منگنی
بھانویں تریہہ نال جُسّہ کلپے
دریاواں تو ، چوئے جِنّاں گھُٹ نہیں منگنا
ہجر دے تتے گھڑے دا پانی
روز، کٹورا بھر بھر پینا
وانگ فقیراں جینا
مینوں تیری سونہہ اے مِترا

مسعود منور

اکلاپے دا مراقبہ

اکلاپے دا مراقبہ

نہ بُلھیاں دے پُھل چُگے
نہ رُوپ دا درشن کیتا
کون سی جس دی خاطر یاراں
جندڑی دا وِش پیتا
کدی کدی میں چٹھّی لکھدا
کدی کدی رب پڑھدا
نہ قرآن دی گل ہی چھیڑی
نہ میں پھولی گیتا
گرجے دے وچ پادریاں
مریم دی چادر لاہی
اساں دوہاں ، عیسیٰؑ دی ماں دا
پاٹا بھوچھن سیتا
ماری باز اُڈاری اُچی
جنگل بولیا چیتا
رب نوں راضی کر نہیں سکیا
رب دا یار مسیتا

مسعود منور

Tuesday, 12 August 2014

وچلی گل تن دھوتا پر من نہیں دھوتا من میلے دا میلا

وِچلی گَل

تَن دھوتا، پر مَن نہیں دھوتا، مَن مَیلے دا مَیلا

لکھ نماز ، کروڑاں سجدے
پھُوڑی اُتّے مَتھے بَھجدے
ذکر جَلی وِچ تسبی رولی
پر عیباں دی گنڈھ نہ کھولی
منبر تے لمیاں تقریراں
پاپی مَن دِیاں سو تفسیراں
ڈھینچوں سِکھیا عقل دا کھوتا
تَن دھوتا، پر مَن نہیں دھوتا، مَن مَیلے دا مَیلا

گھت مُصلّی، خیریں سَلّا
چِلّے کیتے پڑھ پڑھ اللہ
گلّاں دا کھڈکار نگلّا
من ریہا جَھلّے دا جَھلّا
عقل نے کِیتا کم اولّا
اپنے سِر وِچ ماریا کھّلا
پاپاں دے وِچ ہو گیا سوتا
تَن دھوتا، پر مَن نہیں دھوتا، مَن مَیلے دا مَیلا

ویکھن والے ویکھ نہ سَکّے
نظراں دِتّے سو سو دَھکّے
کَن وچارے سُن سُن تَھکّے
بولن والے ہوٹھ نہ اَکّے
اَج تَن تیرتھ، کل تن مَکّے
کِسے وی تھائیں مِلے نہ سکّے
ٹیں ٹیں کردا فقہ دا طوطا
تَن دھوتا، پر مَن نہیں دھوتا، مَن مَیلے دا مَیلا

مسعود منور

خواب نامہ میں جاگدیاں اج ویکھیا

خواب نامہ

میں جاگدیاں اج ویکھیا
اک خواب سُنہرے رنگ دا
اک خواب ہیر دے جھنگ دا
اک خواب گلی چوں لنگھدا
اک خواب سی میتھوں سنگدا
میں جاگدیاں اج ویکھیا

میں ویکھیا اک شہر سی
جتھے لال رنگ دی نہر سی
کسے نویں روپ دی لہر سی
کوئی روپ سی یا قہر سی
میں جاگدیاں اج ویکھیا

میں ویکھیا اجے دیر سی
اجے چڑھی نہ سوہل سویر سی
سکھنے ہتھاں دی سیدھ وچ
اک ہاہواں بھری چنگیر سی
میں جاگدیاں اج ویکھیا

میں سوچیا اوہ کون سی
اوہ پینگھ سی یا پون سی
اُتوں ہجر مہینہ سون سی
بُلھاں تے کوئی گون سی
میں جاگدیاں اج ویکھیا
میں حُسن دا لٹھا میچیا

مسعود منور

کفر دے کالے کلمے

کُفر دے کالے کلمے

عذاب توں بچ، ثواب توں بچ
جے بچ سکیں تے حساب توں بچ
ایہہ روڑھ چھڈدا جوانیاں نوں
نی سوہنیئے، توں چناب توں بچ
بڑے گُناہواں دا سلسلہ ای
توں داڑھیاں دے خضاب توں بچ
ایہہ راہ وی لاوے کُراہ وی پاوے
خُدا دے بندے، کتاب توں بچ
جہالتاں دی اے پنڈ بھاری
توں مدرسے دے نصاب توں بچ
ایہہ دِین دنگا، فساد فتنہ
سوال توں بچ، جواب توں بچ
ملنگ مسعودؔ، عشق پی لے
شریعتاں دی شراب توں بچ

مسعود منور

رب دی دھپ میں کتھے بہ کے سیکاں گا

رب دی دُھپ میں کِتھے بیہہ کے سیکاں گا
سوچن والی گل، مسیتے  سوچاں گا
جنت دا بُوہا تے اج وی کُھلا سی
مُوڈ نہیں سی میرا، میں کل ویکھاں گا
کاں کاں کردیاں کاواں نوں میں کیہ کیہندا
چُپ دے ویلے دل دے گُھنڈ میں کھولاں گا
روندیاں کنڈیاں اگّے ہسدا ریہنا واں
کِھڑ، کِھڑ ہسدے پُھلاں اُتّے روواں گا
نِکّی ساری گل تے پیکے ٹُر پئی اے
ایڈی لال ہنیری کِنج میں روکاں گا
بدلہ لین دے بڑے طریقے ہوندے نیں
تیرے پِچھے عشق دے شِکرے چھڈاں گا
سُکھ تے چین دی فصل وی پکّے گی مسعودؔ
رتّیاں رتّیاں بالو شاہیاں توڑاں گا

مسعود منور

نہ اوہدے سنگ راتاں کٹیاں نہ دل درشن کیتا

نہ اوہدے سنگ راتاں کٹیاں، نہ دل درشن کیتا
کون سی جس دی خاطر یاراں، جندڑی دا وِش پیتا
نہ ای میل نہ ایس ایم ایس تے نہ کوئی سکھ سنیہا
ہُن اسمانوں رب نہیں گھلدا نویں تے سجری گیتا
گرجے اندر پادریاں، مریم دے کپڑے لاہے
اساں دوہاں عیسی دی ماں دا پاٹا بھوچھن سیتا
روپ سروپ دے رنگ سی کیہ کیہ، کیہ دساں میں میتا
کرشن بناں تاں رادھا ویکھان، رام بناں تاں سیتا
ماری باز اُڈاری اُچّی، جنگل بولیا چیتا
عشق دی بازی جِت نہیں سکیا، رب دا یار مسیتا

مسعود منور

دھمال عشق دا بوہا بند سنی دا

دھمال

عشق دا بُوہا بند سُنی دا
آ، رل کے کھڑکائیے
ڈھول وگائیے

مت بُلھا، سانوں لُولہا جانے
پیریں گھنگرو پاِئیے
یار منائیے

برفاں دی من پانی ڈکّے
سورج دی ڈھاہ لائیے
دھوڑ دھمائیے

سُنج بھئی، سب دھوئیں اُجڑے
سجری دھوخ دھخائیے
چُلھہ تائیے

من مسعودؔ، نہ پیر نہ سادھو
کس تھیں صدقے جائیے
رُشداں پائیے

مسعود منور

ادھی اوہ انگریزی بولے ادھی اوہ پنجابی

انار کلی وچ گواچا ہویا سُفنا

ادھی اوہ انگریزی بولے ادھی اوہ پنجابی
وچ وچ تھوڑی اردو شردو، ڈاہڈی لال گلابی
منڈیاں ورگی کڑی دے سر تے نہ چادر نہ چنی
پیراں دے وچ لش لش کردی اٹلی دی گرگابی
اک ہتھ ایم پی تھری پیا لمکے، دوجے ہتھ موبائل
سارے گھر وچ اڈدی پھردی پنجند دی مرغابی
جیہدیاں اکھاں دے وچ کجل ورگے بدل گجن
اوس کڑی وچ ٹھاٹھاں مارے صدیاں دی بیتابی
نہ اوہ ہیر تے نہ اوہ سوہنی اوہنوں کیہ میں کہندا
نیلی جینز تے شرٹ بدامی صورت سی مہتابی

مسعود منور