سن میرے چن سجن

 جدید پنجابی شاعری

سن میرے چن سجن

سن میرے چن سجن

آؤندی اے تیری یاد

کلہیاں رہ کے جی نہیں ہندا

تڑپاں تیرے بعد

توں ایں میری دھڑکن وِچ

ہر ساہ وچ توں وسدا

ویلے ماڑے چنگے جیہڑا سدا نال کھلوندا اے

 پیو دی شان

ویلے ماڑے چنگے جیہڑا سدا نال کھلوندا اے

بے لوث سجن جگ تے بس باپ ہی ہوندا اے

گھربار چلاون لئی، کی کی نہیں کردا اے

سب دُکھ تکلیفاں نوں، ہس ہس کے جردا اے

لَکھ فکراں نے وِچ ذہنے، پر ہس کے وکھاؤندا اے

بے لوث سجن جگ تے، بس باپ ہی ہوندا اے

رونق میلے مک جاندے نیں

 رونق میلے مُک جاندے نیں

ساہ جس ویلے رُک جاندے نیں

جیہڑے کہندے جان توں پیارا

لوڑ پوے تے لُک جاندے نیں

بِیج کے جے نہ راکھی رکھیئے

طوطے فصلاں ٹُک جاندے نیں

حق دا نعرہ وجنا حق اے

حق دا نعرہ وجنا حق اے

ظالم اَگے گجنا حق اے

چُپ جے سادھی جابر اَگے

تِیر تینوں وی وجنا حق اے

یتیماں دا جے پِنڈا ڈھکیا

فیر تیرا وی سجنا حق اے

پٹھیاں گلاں کر نہ جھلیئے

 پُٹھیاں گلاں کر نہ جھلیئے

ایویں ای اکھاں بھر نہ جھلیئے

تیرا ساں میں، تیرا ای آں

سونہہ کھانا واں، ڈر نہ جھلیئے

لوک تے پھرن اجاڑن نوں

کن لوکاں ول، دھر نہ جھلیئے

کجھ حوصلے کر، ہتھ پیر وی مار

بس گھڑے بھروسے، تر نہ جھلیئے

عشق اے ناں ازمائشاں دا

ایہنی چھیتی، ہر نہ جھلیئے

طارق اقبال حاوی