کھان دی تینوں سوڑ پئی اے چھیتی چھیتی پیلاں پا

 جدید پنجابی شاعری

کھان دی تینوں سَوڑ پئی اے چھیتی چھیتی پَیلاں پا

اصلی پَھل تے پیڑاں اُتے سہجے سہجے پکدے نیں

اپنے ہمیشہ ویر کماون غیراں دی کیہ بات کراں

ہس ہس جیہڑے رستہ وکھاون اوہو رستہ ڈکدے نہیں

جان کاشمیری

اگے پِچھے سجے کھبے اتے تھلے ہون دیاں

 اَگّے، پِچّھے، سجّے، کھبّے، اُتّے تھلّے ہون دیاں

باقی سارے جُھوٹے دعوے موجاں پلّے ہون دیاں

ویکھ کے اوہنوں نال خوشی دے دل دی دھڑکن بدل گئی

سِر تے سمجھو آئیاں گھڑیاں بلّے بلّے ہون دیاں

اَج انسان وی مینوں لگدے روپ کوئی روبوٹاں دا

دونویں کردے ہس ہس گلّاں کلّے کلّے ہون دیاں

آپے رل مل موجاں مانن دکھ اے سارا اینی گل دا

 آپے رل مِل موجاں مانن دُکھ اے سارا اینی گل دا

مینوں تیرا دشمن جانن دُکھ اے سارا اینی گل دا

ڈُبدے ڈُبدے ڈُب گئے تارے چن دی لَو وی گھٹدی جاوے

میرے گھر نہ ہویا چانن دُکھ اے سارا اینی گل دا

ایرا غیرا نتّھو خیرا دنیا ویری اوہناں دی اے

پیار دے جیہڑے تمبو تانن دُکھ اے سارا اینی گل دا

لوکی گھر گھر پچھدے پھردے میلی پگ دے اندر کون

 لوکی گھر گھر پُچھدے پِھردے میلی پگ دے اندر کون

میں وی چنگا تُوں وی چنگا،۔ مندا جگ دے اندر کون

سیک نے تانے چاروں پاسے اَسماناں تیکر تمبو

اَگ دے اندر جھاتی پاؤ، رہندا اَگ دے اندر کون

بندے دی اوقات کی دساں، بندے دی اوقات اے ٹھاہ

ویلے کویلے ٹھگیاں لا کے، گُڑکے ٹھگ دے اندر کون