پاکستانی،پنجابی، سندھی، بلوچی، پشتو، ہندکو، پوٹھواری،کشمیری، پہاڑی، گوجری، شینا، سرائیکی، براہوی زباناں دی شاعری دے سوہنے، سجرے تے رنگلے پھلاں نال سجیا ہویا شعری گلدستہ Punjabi, Sindh, Blochi, Pushto, Hindko, Pothwari, Kashmiri, Pahari, Gojri, Shina, Saraiki, Brahavi & other, regional, poetry
پنجابی شاعری
جس ورقے دے اُتے لکھیا ویکھاں تیرا ناں
اوہنوں چماں آکھیں لانواں رکھا اُچی تھاں
سب توں افضل ذکر تِرا اے تیرے بندیاں نوں
جس دی برکت نال سُلگدی دُھپ دی ٹھنڈی چھاں
اے دھرتی اے دَین تِری تے تُوں ای اہیدا سبھ
وَسدے رکھیں رہندی دنیا تائیں شہر گراں
پنجابی شاعری
فن دی خدمت انج لکھاری کردے نے
لکھتاں اندر خون جگر دا بھردے نے
کالے بدل لنگھ جاندے نے شہراں توں
دریاواں دے اتے جا کے ورھدے نے
ہو جاندی اے نویں خیالاں دی تخلیق
ذہن جدوں وی سوچ سمندر تردے نے
خورے کدھروں اک خوشبوئی واواں نال
آوے تے فر کھہہ کھہہ جاوے ساہواں نال
کدی کدائیں وچھڑے ویلے دی اک یاد
دل دا میل کراوے کھنجیاں تھانواں نال
جد مُڑئیے تے جی آیاں نوں آکھے کون
کون سفر تے ٹورے گھروں دعاواں نال
پنجابی شاعری
کیہہ دِلا ہن کرانیاں اوہنوں
یاد گلاں پرانیاں اوہنوں
آئیاں تے نہ آنیاں اوہنوں
توڑ سانجھاں نبھانیاں اوہنوں
اوہ سُکھی اے سُنان کیہہ جاناں
درد بھریاں کہانیاں اوہنوں
کُنڈل اوہدے والاں دے
پھردے وچ خیالاں دے
رستے وچ کھلوتے آں
پچھلے کئیاں سالاں دے
گُنجھلدار اے تیری گل
حالے ہور مشالاں دے
رُت بدلی تے وا دی کُچھڑ، چڑھ گئیاں خُوشبواں
نویں سفر دے سپنے دیکھن، لگ پئیاں خوشبواں
ایس طرحاں دا سُورج چڑھیا، ہرے بھرے رکھ سکے
آ گئے موسم تت بھڑتے، ہُن گئیاں خوشبواں
اوڑک گھر نوں مُڑناں پیناں، گھر ورگا سُکھ کتھے
سفراں دے وچ کدے نہ لبھن، گھر جہیاں خوشبواں
