بیوی کی التجا
گھر نوں چھیتی آ وے بیبا
اینج تے ناں تڑپا وے بیبا
سانوں چوٹھے لارے لا کے
یاراں دے نال شام منا کے
آ جانا اے رات لنگھا کے
کج تے شرماں کھا وے بیبا
گھر نوں چھیتی آ وے بیبا
طعنے معنے سن کے جگ دے
شام سویرے ہنجوں وگدے
پلے پے گئی میں کس ٹھگ دے
او راتی کیہڑے دفتر لگدے
کُج تے شرماں کھا وے بیبا
گھر نوں چھیتی آ وے بیبا
تے عشق تیرے وچ بازی ہر کے
سس سوہرے دی خدمت کر کے
دیوراں نِنداں کولوں ڈر کے
کی لبھا اے سب لئی مر کے
کسے ناں کیتے چاہ وے بیبا
گھر نوں چھیتی آ وے بیبا
دل وچ میرے آون صلاحواں
اپنے ستوں ویر بلاواں
رو رو اپنا حال سناواں
تینوں پھینٹی رج لواواں
آوے فیر مزا وے بیبا
گھر نوں چھیتی آ وے بیبا
تیرے دل وچ نار اے کیہڑی
وڈی اوہ فنکار اے کیہڑی
ساڈے ہن وچکار اے کیہڑی
دس کھا اوہ مٹیار اے کیہڑی
کھچ لاں اوہدے ساہ وے بیبا
گھر نوں چھیتی آ وے بیبا
زاہد فخری
