دیہاڑی دار
اِک دیہاڑے اَکّھاں والا اِک مزدور
سڑک کنارے
وانگ کبُوتر اَکّھاں مِیٹی
تِیلے دے نال ماں دھرتی دا سینہ پھولے
خورے کنک دادا نہ لبھّے
گینتی اپنے اَگے دَھر کے
چوری اَکّھیں ویکھ کے اپنے آل دَوالے
کر کے منہ اسماناں وَلّے
ہولی ہولی بھیڑے بھیڑے اَکّھر بولے
اُچّی اُچّی
اُچیا رَبّا، سچیا رَبّا، چنگیا رَبّا
تُونہیوں ڈُبیاں تارَن والا
ساری دنیا پالن والا
جتھّوں کل اُدھار اے کھاہدا
اُوتھے وی اے اَج دا وعدہ
میری اَج دیہاڑی ٹُٹّی
میرے دل چُوں تیری چُھٹّی
اُچیا رَبّا، سچیا رَبّا، چنگیا رَبّا
پنجاں کلیاں مگروں جیہڑا
میرے ویہڑے کِھِڑیا پُھل
باہحھ دوائیوں
پُونی ورگا ہوندا جاوے
میرے مستقبل کا دِیوا
ویکھیں کِدھرے بُجھ نہ جاوے
اُچیا رَبّا، سچیا رَبّا، چنگیا رَبّا
اَج نئیں جانا خالی ہَتھ
ویچاں بھانویں اپنی رَت
بابا نجمی
