جھولی پائیے دکھ سکھ سارے طعنے معنے سہیے

 جدید پنجابی شاعری

جھولی پائیے دکھ سکھ سارے طعنے معنے سہیے

نال سجن دے رہیے، ہر دم نال سجن دے رہیے

باجھ سجن دے کیہڑا پُچھے حال دِلے دا

باجھ سجن دے کیہڑا ایسراں آن ملے دا

اوکھی بھاری بن جاوے تے اوسے تائیں کہیے

نال سجن دے رہیے، ہر دم نال سجن دے رہیے

اقبال نجمی

خالق ایں توں سبھ دا تے سبھاں دا معبود

 پنجابی عارفانہ کلام

خالق ایں تُوں سبھ دا تے سبھاں دا معبُود

جلوہ تِرا ہر تھاں، رہویں ہر تھاں موجود

ہویا اے تِرا لُطف سدا ای مولا

ڈُھکے جو تِرے کول اوہ پائے گا سرُود

محمد اقبال نجمی

ہویا مرے مولا دا کرم اے کنا

 پنجابی عارفانہ کلام

ہویا مِرے مولا دا کرم اے کِنا

اکھیاں چ مِری ویکھ تُوں نم اے کنا

رکھے نیں قدم ویکھ تُوں کتھے نجمی

تُوں ویکھ تِرے کول حرم اے کنا

محمد اقبال نجمی

جھولی چ مری خیر دا لقمہ پائیں

 پنجابی عارفانہ کلام

جھولی چ مِری خیر دا لقمہ پائیں

کمزور آں بندہ تِرا مولا سائیں

جو کجھ اے مِرے واسطے چنگا دے دے

رستے تے سدا اپنے توں مینوں لائیں

محمد اقبال نجمی

دسدی اے تری شان میں جدھر ویکھاں

 پنجابی عارفانہ کلام

دِسدی اے تِری شان میں جدھر ویکھاں

تُوں سامنے میرے ویں میں کدھر ٹولاں

ہے رات دا انھہیرا، یاں اے دن دا چانن

جلوہ تِرا ہر تھاں اے جے سوچاں سمجھاں

محمد اقبال نجمی

میں حمد جے لکھاں تے ہے تیری رحمت

پنجابی عارفانہ کلام

میں حمد جے لکھاں تے ہے تیری رحمت

میں نعت جے لکھاں تے ہے تیری شفقت

تیرے ای کرم نال نیں گلاں سبھے

ہمت اے قلم وچ تے زباں وچ طاقت

محمد اقبال نجمی

عزت اوہو عزت اے جو دیوے مولا

 پنجابی عارفانہ کلام

عزت اوہو عزت اے جو دیوے مولا

طاقت اوہو طاقت اے جو دیوے مولا

بے کار نیں جھیڑے ایہ زمانے بھر دے

نعمت اوہو نعمت اے جو دیوے مولا

محمد اقبال نجمی