دکھ مینوں فنکار بنا کے چھڈے گا

 جدید پنجابی شاعری

کوئی امر کردار بنا کے چھڈے گا

دکھ مینوں فنکار بنا کے چھڈے گا

ڈر اندر دا یا تے مار مکاوے گا

یا اک دن جیدار بنا کے چھڈے گا

اوہدی فطرت اوہنوں کلیاں کر دے گی

اوہ کنے کُو یار بنا کے چھڈے گا

وحید رضا

نہ چھلاں دی نیت ٹھیک اے نہ پتوار سلامت نیں

 جدید پنجابی شاعری

نہ چھلاں دی نیت ٹھیک اے نہ پتوار سلامت نیں

ہاں پر بیڑی بنے لاون دے دعوے دار سلامت نیں

نفسا نفسی دے ایس دور اچ یار خدا دی نعمت نیں

یار سلامت ہون تے سمجھو بھرم تے بھار سلامت نیں

بھلیو لوکو! دکھ دے نال اس گل تے غصہ بنڑدا اے

ککھ نئیں بچیا جھگے دا تے چوکیدار سلامت نیں

وحید رضا

کوٹھی دا نہ کار دا دکھ اے

 جدید پنجابی شاعری

کوٹھی دا نہ کار دا دُکھ اے

میرا دُکھ سنسار دا دُکھ اے

خنجر یاں تلوار دا دُکھ نئیں

جنہاں دل تے وار دا دُکھ اے

اپنے دُکھ دا دارُو لبھے 

جنوں میرے بھار دا دُکھ اے

سوچ کے دسنا کی ایہہ چھوٹا مسئلہ اے

 جدید پنجابی شاعری

سوچ کے دسنا کی ایہہ چھوٹا مسئلہ اے

دُنیا دا ہر مسئلہ میرا مسئلہ اے

دل کہندا اے ہوندے رہن گے مسئلے حل

ذہن دی ضد اے نہ بھئی مسئلہ مسئلہ اے

اک در ہے آ، جیہڑا کُھلیا رہندا اے

سو در بند وی ہون تے کیہڑا مسئلہ اے

لباں تے جو دہائیاں نیں

 جدید پنجابی شاعری

لباں تے جو دہائیاں نیں

جوابی کاروائیاں نیں

اسی فطرت دے قیدی آں

مرن مگروں رہائیاں نیں

اصولاں تے صلح ساڈی

اصولاں تے لڑائیاں نیں

میل من دی اتار دیندا اے

 جدید پنجابی شاعری

میل من دی اتار دیندا اے

عشق ہستی نکھار دیندا اے

کوئی وعدے دی موت مر جاندا

کوئی وعدہ وسار دیندا اے

ہجر دی اک بڑی سہولت اے

عین جوانی چ مار دیندا اے

وحید رضا